林家謙洋蔥剖白！冀移民港人永記我城一切 爆喊自揭屢欲煞停紅館個唱 獲爆肌Tyson Yoshi公主抱

林家謙首個紅館演唱會圓滿落幕，一連7日連加場和補場，都有好友Serrini坐陣，其中最尾兩場更有另一好友Tyson Yoshi撐場。爆肌的Tyson不但與Serrini聯手，強行除下家謙外套，更「公主抱」起他，大放笑彈。歡笑聲中，亦有洋蔥！家謙在台上剖白時爆喊，透露自己臨開騷前因擔心唱功和自唱歌曲不足，多次想煞停個唱，幸獲林夕致電開解；並寄語很多即將移居外地生活的港人，要永記我城一切，「我哋某年夏天再相聚」。

Tyson Yoshi在家謙個唱第6晚登場，並與Serrini同台亮相。Serrini叫Tyson為她「報仇」，齊齊除去家謙外套，更忽然大爆：「Tyson點解你咁鐘意佢（家謙）？因為有一次林家謙同我講，唔知點解你咁鐘意佢......」Tyson即抵死回應 : 「你咪咁自以為是啦！林家謙！」Serrini又不停叫Tyson親吻家謙，笑言自己這幾天都吻不到。

至第7晚，Tyson繼續與Serrini「夾攻」家謙的外套，3人再在台上玩到癲。Serrini指，家謙聲稱自己有6嚿腹肌及26吋腰，又踢爆家謙開騷前，在後台忽然拍她的門，打斷其冥想。家謙則笑言以為她正在「屙屎」。Serrini亦反問為何Tyson和家謙忽高忽低，暗示2人矮小，要穿高跟鞋，家謙即笑稱方是「怪魔」。但要數全場最爆笑一幕，莫過於Tyson「公主抱」家謙，全場起哄。

正如陳蕾《相信一切是最好的安排》歌名一樣，塞翁失馬，焉知非福？風暴「馬鞍」8.25竄訪香港，令家謙被迫停唱1晚。當晚演出嘉賓陳蕾，延至補場亮相。而由加拿大趕返香港撐場的鄧小巧，因收不到二維碼而錯過返港航班，加上馬鞍襲港，令她滯留機場48小時，但最終仍趕及在補場現身，唱出家謙寫給她歌曲《可惜你是個人》。家謙則感謝對方「拋夫」撐場，令其個唱變得完整：「我最好嘅旋律都畀咗你」。

家謙連日來在多場演出都感觸落淚，尾場在台上剖白時更顯激動，屢次爆喊。他提到舉辦今次個唱前，因知道自己不夠自家歌曲，已積極創作新歌，但看見流程表仍不夠歌曲填滿，感到沮喪，加上擔心自己唱功未夠好，多次想過取消個唱，最近一次是開騷前2周，幸獲林夕致電開解。他又寄語看騷後離開香港到外地過新生活的人，要永遠記着這個城市的一切，希望「我哋某年夏天再相聚」。

相片由田木集作提供