前日（16日）本台報道過兩位香港人因為受朋友邀請去泰國旅行，結果被綁架到緬甸，隨後多間傳媒機構都就事件作多方面報道，成為熱話引起廣泛關注。事主A再次找到機會跟本台記者聯絡，指現時當地公司氣氛緊張，管制亦越來越嚴。
事主A表示公司對員工的管制越來越嚴，「限制我哋返工嘅時候唔畀講方言，一定要講普通話，唔可以講工作範圍以外嘅嘢，同埋唔可以自己試圖聯絡其他公司嘅人，或者交換聯絡方式，如果知道，全部一律坐黑房處理。」黑房是指密封的房間，幾乎所有園區都設有，黑房沒有窗、燈、風等，又熱又焗又黑，有傳更會在內用刑。目前事主A尚算安全，但表示與其無了期等待求援，反倒想博一博，「見你哋報道話事主有提供到相同片，不過因為人身安全唔報道出嚟，我覺得如果過多半個月至一個月，香港政府或警察都沒有回應，可以試下將呢啲片同相報道出嚟，我呢度仲有幾個香港人，所以我睇下到時係咪真係無乜迴響，無乜迴響嘅話就我覺得可以將我啲相同片曝光，因為我嗰啲相同片係影到入面，甚至影到軍人揸槍，希望政府可以快啲採取行動！」本台會盡力跟事主保持聯絡，若日後獲得受權才會公開更多資料。
【新聞有價 記者有格 立即訂閱：https://bit.ly/3wGQh7c】
今早（18日）前油尖旺區議會副主席余德寶在電台節目指，收到2宗港人求助個案，並聯絡了人道機構幫忙，「跨境犯罪…特別事發地點…講白啲係三不管嘅地方，連緬甸軍政府其實都難啲插手，甚至警方或部份人員可能同流合污，所以某程度上都要靠一啲地區嘅志願團體去幫手協助。」余德寶希望香港警方和保安局可以提供協助，「台灣政府喺台灣當地捉到一啲接頭人或蛇頭嘅人，所以我哋都希望香港警方係可以咁做，而唔係純粹話無司法管轄權，就乜都做唔到。」另外，立法會議員葛珮帆亦指保安局可以考慮發出旅遊警示，「最得人驚嘅係佢哋捉咗自己人，台灣人呃返台灣人，香港人呃返香港人，以往好少因為咁樣而發出旅遊警示，但係因為形勢成日都變，我覺得保安局都可以喺呢方面去諗一諗，就算唔正式發出旅遊警示，都需要喺網上同唔同嘅媒介勸喻，呼籲香港市民提高警覺！」
保安局今日聯同警方和入境處招開聯合記者會，指高度重視相關事件，三個部門已成立專案小組進跟。保安局副局長卓孝業指，自1月至今共收到20名港人求助，其中12人已確認安全，當中10人已回港，2人尚在當地但安全。卓又表示另外8位暫時仍相信在外的市民都自稱身處緬甸，局方會用盡所有渠道，盡力向他們提供協助。警務處聯絡事務科高級警司陳樂生則談及有關刑事調查方面資訊，「警察非常重視海外港人求助嘅案件，我哋已經交由有組織罪行及三合會調查科，合併並重新檢視一次呢啲案件，6月至8月見到數字上升，所以警方喺7月透過fb做咗呼籲，希望市民特別留意，唔好墮入呢啲陷阱。」入境處協助在外香港人居民小組主管、總入境事務主任蔡宇飛表示，大部份個案嘅家屬指事主都身處緬甸，「佢哋嘅人生自由受到限制，當然我哋入境處會繼續同外交部駐港特派員公署，同埋當地使領館會提供一切可行嘅協助。」卓孝業又指香港對東南亞國家的旅遊警示是黃色，特別提醒市民如無必要別前往緬甸的北部和南部等地區。若在外香港居民需要協助，可致電入境處24小時熱線（852）1868。
