求救！2港人親述去泰國旅行被綁架 困緬甸被迫做詐騙 女友急切恐男友尋死 受騙苦主呼籲「救咗返嚟先」

最近網民關注有馬來西亞、新加坡、台灣人等被賣豬仔去柬埔寨，亦有提及香港人都被捉，最近Channel C就收到兩位香港人求救，因為有香港朋友在泰國工作，邀請他們到當地旅行，結果慘被綁架到緬甸！他們在緬甸要為詐騙集團工作，公司稱是以真金白銀把他們買回來，若想離開，一是繳付巨額贖金，二是從事詐騙工作還錢，否則便把他們送往更危險的地方。（**為免兩位事主的身份曝光，或陷入更危險境況，本報道將不會公開他們到埗日期、身處地點、任何相或影片等資料。）

個案1：
事主A稱有位認識了一至兩年的香港朋友在泰國工作，一直以為雙方「算係幾friend」，所以當對方盛意拳拳邀請他到當地旅行，更為他訂購機票和酒店時，事主A便收拾行李便飛往泰國。到埗後，該朋友指「會有人帶路」，然後他便不斷轉車，問到過程中曾否起疑，事主A稱他沒時間思考，「去到某啲位無得揀，因為有車嚟接我，嚟到即刻拎我啲行李搬上車，個朋友叫我每次轉車落車都同佢講，影車牌畀佢睇，佢確定啱喇，先叫我上車，然後去到緬甸嗰刻就走唔到喇，即喺泰國嗰時我都仲知道自己喺泰國，仲以為係搭車過去搵佢，過河嗰刻就返唔到轉頭。」事主A稱已把該朋友在香港有上台的電話號碼交給警方，但現已失去聯絡。

個案2：
事主B同樣接受了在泰國工作的朋友邀請到當地旅行，他到埗首晚，朋友便到其酒店接待，並叫車到商場吃晚飯，豈料該車往商場的相反方向駛，不久便出現三至四個持槍的人截停車輛。事主B指朋友是略懂泰文，「佢就落車同佢哋傾，但係喺草叢傾咗陣，就聽到三下槍聲砰、砰、砰，從此我就無再見過我朋友！」

事主A的女朋友S小姐接受Channel C訪問指，沒想過有香港人會把朋友「賣豬仔」，她坦言不認識「該朋友」，只知道他在旅行前曾與男友視像通話，又拍照給他看，說到時住在哪裡等。她透露緬甸公司曾向男友展示轉帳紀錄，「嗰度畀咗介紹費畀佢朋友，佢朋友收咗介紹費之後，就無再理過我男朋友，間公司仲話唔知我男朋友係被呃過去，堅稱係搵人介紹佢去，又話無論如何買佢嘅錢洗咗，佢都要喺嗰邊做嘢。」她轉述男友曾聽公司高層指，「如果你等錢洗，可以介紹人過嚟做嘢，會有介紹費收，譬如介紹幾個人入嚟，你就自己可以走。」

S小姐接受訪問時情緒穩定，理性得令記者嘖嘖稱奇，S小姐解釋要哭的日子已經過去，現在不能讓男友擔心，要關顧男友和其家人的情緒，以及不斷向外求救。她直言：「依家急都無用，就算真係籌錢，借都好，畀佢出到大門口都好，仲要諗佢出去之後點樣成功安全返泰國？佢喺緬甸無入境紀錄，護照又被沒收。」S小姐又指男朋友的爸爸每日都會聯絡她，詢問兒子的情況，「時刻都關心，至少每日都打電話，或者WhatsApp報平安，但屋企人都無能為力。」事主A的家人已經就事件報警，S小姐指警方表示會交給國際刑警處理，雖然暫時只能等待消息，但警方一直有與她保持聯絡。

由於兩位事主都要從事詐騙活動，公司無可避免讓他們與外界接觸，S小姐表示公司都知道男友已經報警，「已經講明報警、報上中央都無用，對方講明㗎，警告佢唔好搞小動作。」S小姐最擔心男友會被困進黑房，「佢聽聞話黑房入面有啲人被打到豬頭咁，有啲人斷手斷腳斷肋骨，總之被打到好傷，聽聞當地請咗過千名軍人，如果業績唔好或者搞小動作，都會被送入黑房。」S小姐希望傳媒可以報道此事，「想有更多人關注，睇下有冇方法救到佢，同埋唔想更多人受騙入去。」而事主B的家人亦有報警，亦已聯絡過當地和香港的領事館、大使館，一些國際救援組織及各大傳媒等，總之任何方法都嘗試，希望可以有一線生機。

兩位事主形容居住的地方好像「渡假村」，有飯堂、餐廳、卡啦OK、籃球場、SPA、酒店、賭場等，但他們每日的主要活動是上班，從事詐騙工作，每日做10多小時，每星期上班6日半。他們要跟從劇本，寫明了指定日數要做甚麼，例如用兩至三日了解客戶資料，再用五至七日做好朋友，一星期便嘗試講投資看客戶反應，若不反感便繼續包裝自己，以培養感情等，直至引導客戶透過指定網頁或App開帳戶匯錢。

苦主李小姐是事主B的詐騙對象，雖然損失過萬港元，但她都主動找本台幫事主B求救，「我覺得人身安全係最緊要，我唔理佢係被綁架定自己去被人呃，最好救返香港先。」李小姐是在加密貨幣群組認識事主B，曾匯錢到事主B介紹的一個所謂交易所，「我覺得匯$1800美金已經好足夠，一直無打算再匯錢入去嗰個戶口。」而有一天，事主B跟李小姐說該交易所有一個活動，當時她已跟事主B表明沒興趣。豈料之後事主B再問她有沒有興趣買Bitcoin，李小姐便起疑心，「我覺得好古怪，就嘗試喺嗰個交易所申請匯出啲錢，等咗大約24個鐘，就收到交易所拒絕咗我嘅申請。」當時李小姐仍未百分百肯定事主B是騙徒，還是跟她一樣是受害者，因而仍有跟事主B閒聊。事主B一直以受害者的身份跟李小姐保持關係，更勸她去報警，但李小姐認為被騙的錢難以尋回，便沒有理會。

直至有一次事主B表示想跳樓，「我以為佢輸咗好多錢，點知傾傾下先話係因為去泰國旅行被綁架，嗰刻我先驚覺，唔怪得佢成日叫我去報警。」李小姐知悉真相後立即去警署，就詐騙案和事主B的經歷報案，「警察都同我講，事主嘅Case有重案組跟緊。」事主B指的確曾經站在天台跟李小姐通電話，「如果我再開唔到單，我都會被送去緬北，去黑市買賣器官，我每日都做緊抉擇。」事主B坦言身處當地，難免害人，「我為求自保，就要害人，我無情緒㗎喇，喺度剩係得生存同死亡！」他又指當時李小姐勸他繼續向不同機構求助，嘗試看看會否有任何方法，「佢話如果真係無方法，她都唔阻止我跳樓。」

被困時間越長，越消磨兩位事主的意志。S小姐解釋自己越來越急切的原因：「我男朋友嘅情緒越嚟越唔穩定，開始係好似想硬碰硬，我唔知佢會做啲咩，佢覺得可能博一博，但最後畀人...喺嗰邊人命係好cheap，無咗一個人仲有好多個，可以隨時殺咗佢，我男朋友話『咪由佢殺囉！』佢仲話『算啦！我都唔想再做呢啲嘢，好想死，你哋唔好諗辦法嚟救我喇！我自己了斷自己算啦！』所以我想...點講呢，想穩住佢嘅情緒，同時都想盡快救佢出嚟。」

Channel C就事件向PPRB查詢，警方指兩個個案都是由事主家人報案，一個報稱失聯，一個報稱被綁架，都列作「求警調查」，分別交由東區警區重案組和西區警區重案組跟進。大家或仍有很多疑問，但為免受訪者身份曝光，大量資料暫未能公開。消息指，被困港人數目正持續上升，在此呼籲香港人請提高警覺並保持關注，本台亦會繼續關注。