移民潮下，因為熱門移民國家（英國、加拿大、澳洲等）屬英語國家，申請移民簽證都需要考IELTS（雅思 / 國際英語水平測試），所以都多咗人搵相關補習，為咗考好個試，你又會出幾多錢呢？
近日喺Facebook「補習老師/家長/托兒配對（免費,非中介）/tutor/babysitting/ 課程推介」群組中，有人竟然以1千蚊5小時，即係一個鐘200蚊，嚟請一個IELTS Academic 全科9.0（滿分）成績嘅老師，相關要求仲包括「女老師／最近教過學生成績IELTS Academic全科7.5或以上／有方法教READING (scanning skimming) 快速搵答案／全科補習(Listening, Reading, Writing, Speaking)／熟悉近期IELTS問題」，仲要希望「""""""短期內"""""""考獲全部4科7.5」成績。
唔少網民喺post下面留言，話樓主唔知市價：「正常價應該喺一千蚊一個鐘🥲」，又笑「全科9收兩舊，咁我老豆都變鬼佬啦」。究竟全科9.0係咩概念？有人就話自己去大型補習社個英文老師都冇咁勁，仲話當年全科9.0就已經要上報紙，好罕見咁話。
除咗移民之外，唔少人都會考定個IELTS旁身之用，咁究竟坊間IELTS私人補習或者係其他語言基準試，市價又係幾多？Channel絲睇過幾個搵補習嘅Facebook／TG群組，發現呢類型公開試補習每小時收費都起碼$300-400，如果導師本身都有返咁上下料子，收費都可以去到$600-800一個鐘。到頭來，私人補習都係一個交易，最緊要同補習老師傾好價錢，包啲乜，點教，先好畀錢啊（仲要記住唔好一次過畀好多堂嘅學費，可以睇返我哋之前嘅報導）！
