蔡卓妍（阿Sa）昨日（22日）42歲生日，正與鍾欣桐（阿嬌）於加拿大舉行巡唱的她，跟工作人員到餐廳慶祝時，獲送贈插上數字「24」的蛋糕，但她誠實地將蠟燭調轉。
Twins日前剛完成溫哥華站巡迴演唱會，昨日正日生日的阿Sa，與阿嬌來到多倫多尼瓜拉瓜大瀑布，大隊一齊去了日本餐廳慶祝，工作人員把插到蛋糕上的數字改「24」，但阿Sa非常正面地自己把蠟燭調番轉：「你睇下我個人幾誠實！哈哈。人係會長大，假如今日我停留係24，大家就再見唔到我啦。我極度開心自己一年大一歲，證明我健健康康快快樂樂地活着，好好享受生命每一刻。」日本餐廳嘅服務員重好熱情，主動為阿Sa跳舞慶生，還有靚仔叫阿Sa拍他臀部，又想拉她跳舞，嚇到阿Sa狂笑不止，十分搞笑。
壽星女阿Sa表示由香港機場出發就已經開始收蛋糕，到溫哥華及多倫多仍歌迷不停送上生日蛋糕及生日禮物：「由香港機場到依家，已經吹咗7個蛋糕，有啲係歌迷親手整，有啲係朋友送。今年生日好特別啦，因為時差關係，有兩日呀。感恩自己今年做咗好多嘢，雖然好忙但係好充實嘅！希望嚟緊呢一年，身體健康繼續有無窮無盡嘅精力，工作之餘仲可以去多啲旅行，Work hard，play harder！多謝大家嘅生日祝福，我收到晒！」
Twins異口同聲表示覺得今次巡演份外非常珍貴：「因為真係唔知幾時會再做咁長時間巡演啦，6場成個tour差唔到走20多日，唱完多倫多、之後重要去大西洋城、拉斯維加斯，雷諾，再去英國倫敦！年紀愈大就愈覺得張學友，劉德華佢地好勁，六十幾歲重唱成百場，我哋兩個六十幾歲嗰年都唔知會點啦！歌迷都或者湊孫，唔得閒理我哋啦！所以好期待今次每一站見到唔同地方嘅歌迷，好珍惜每一刻相聚。」
TWINS SPIRIT演唱會一直以來都是四面台，到溫哥華開始變身三面台，兩人也還未全習慣，所以經常有很多蝦碌發生，例如走錯位，行錯方向等等，非常搞笑。溫哥華站兩人落台跟觀眾握手，更引起全場瘋狂，群情洶湧。阿嬌準備返舞台時，行經控制台附近無法前進，結果只有上控制台度坐了一陣，等觀眾返回自己位置冷靜，嬌嬌更突然叫大家一齊同唱生日歌慶生，阿Sa係台上笑言：「點解你係個度唱嘅？哈哈。」阿嬌笑說：「好少可以係人群之中咁狀態，好特別呀，大家一齊唱生日歌畀阿Sa聽！祝你生日快樂！」
對於握手群情洶湧，但阿Sa無有怕：「其實我係一個幾鍾意同觀眾握手嘅人，哈哈，因為每一個近距離握手觀眾，都係四萬咁口望住你，都好開心㗎，好似大家互相交換開心能量咁，好正。」阿嬌說：「好耐無嚟加拿大，見到朋友仔好開心，仲飲到老豆屋企煲既湯水，好暖心。觀眾反應都超乎自己預期啦，咁耐無嚟大家都咁熱烈，都好開心。因為舞台有變化所以要記好多新位置，第一場仲有jet lag，個人未係好warm up，希望之後幾場越來越好！」
Twins #蔡卓妍 #鍾欣桐 #加拿大 #溫哥華 #多倫多 #尼瓜拉瓜大瀑布
