大家好，我係風暴暹芭。可能有啲人覺得，我係不速之客，因為我喺7.1會掠過香港，抹殺大家戶外活動嘅興致。其實你哋點鬧我影響到你嘅生活，老實講句，I totally don't fucking care，但我就接受唔到大家睇小我嘅發展潛力同威力囉。
【新聞有價 記者有格 立即訂閱：https://bit.ly/3wGQh7c】
我好記得，香港、日本、台灣同內地氣象部門喺6.29朝早至中午畀「出世紙」我，但佢哋一開始預測我喺7.1晚至7.2朝最接近香港嗰陣，只係增強到中心風力70至75km/h嘅熱帶風暴。Come on! 乜我有咁孱弱咩？
好彩過去一兩日，我得到西南季候風源源不絕嘅濕潤氣流大力加持，加埋南海中部好高嘅海溫，不斷提供能量畀我增強。雖然高空風切變有嘗試推走我爆出嚟嘅對流雲團，但我冇放棄到！我努力咁捲好啲對流雲團，唔畀你哋睇死。
結果呢？7.1朝早9時，天文台評定我係中心風力105km/h嘅強烈熱帶風暴，相比一眾氣象部門當初估我最接近香港嗰陣，只係中心風力70至75km/h嘅熱帶風暴，而家已經至少強咗一級。仲有唔好忘記，我而家仲未掠過香港喎，仲有空間可以再增強。天文台喺7.1朝早就估我晚上最接近香港，第二朝臨登陸廣東西部嗰陣，可以增強到中心風力120km/h嘅颱風呀。
我隻「眼」唔係證據，因為我到7.1清晨都仲未捲到隻風眼出嚟，但日本氣象衞星向日葵8號隻「眼」就係證據。佢支鏡頭，一直見證着我點樣努力成長。話晒我個名Chaba都有來頭㗎，代表緊喺熱帶地區生長嘅木槿花。我點都對得住畀名我嘅泰國嘅。你哋就放長雙眼，睇我最終發育成點啦！
天氣師李鈺廷代筆
2022年7月1日凌晨4時
2022年7月1日凌晨4時
