上月在亞洲盃外圍賽中連續兩仗取得入球的港足前鋒安永佳，賽後人氣急升，憑着俊朗外表獲封為「港版C朗」。他日前完成泰國賽事返港隔離後，更為昂坪360拍攝廣告，雖然兼顧踢波同拍廣告，但他指暫時仍會以足球事業為先，如果不影響練波，都會考慮其他演藝工作，仲話「平時我鍾意啲Rap嘅歌，唔知第時有冇機會唱比大家聽吓！」
【新聞有價 記者有格 立即訂閱：https://bit.ly/3wGQh7c】
曾做過硬照Model的安永佳雖然都習慣面對鏡頭，但亦有怕醜一面，就是對於被封為「港版C朗」及成爲新一代男神，他感謝Fans的支持和關注，並指自己都好鍾意C朗，「會繼續努力為香港足球爭光，希望香港市民繼續支持本港運動員，為港隊打氣。」
他又表示，未習慣被fans包圍：「以前出街好簡單，依家可能有人會認得我、想同我影相，係開心嘅，不過真係未算好習慣。依家我都會同自己講，要踢得更好、表現更好，唔好比人覺得係靠外表，如果球迷同我講『安永佳好波』，我會更加開心。」被問到感情狀況，安永佳就透露現時單身，理想女友是開朗同外向，「最好同我一樣都係鍾意運動。」
在香港土生土長的安永佳是港紐混血兒，2019年畢業回流香港加盟傑志後展開職業足球員生涯。除了在亞洲盃外圍賽為港隊共添入兩球外，他早年亦曾隨紐西蘭U17操練備戰U17世界盃，並曾在2020至2021年香港超級聯賽射手榜排名第一。
