旗下藝人MIRROR、ERROR等都是廣告商的寵兒，加上節目跟緊潮流，所以近年ViuTV的廣告客戶有增無減。然而，電視廣播（TVB）（00511）在Linkedin發表帖文，以一句「匪夷所思」為開首，質疑客戶落傳媒廣告的決定。事件於社交媒體惹起熱議。
【新聞有價 記者有格 立即訂閱：https://bit.ly/3wGQh7c】
帖文提出3個問題，「點解CPRP（收視點成本 Cost per rating point）貴到咁都仲要買？」、「點解Ratings咁高都睇唔到？」、「點解Marketers唔要高ROI（投資回報率 Return on investment）？」並問道：「如果你係marketers，你會點揀？ 唔通你真係唔使同老闆交代？」
TVB表示，該台台慶劇《下流上車族》首播高開，首集平均直播收視22.5點，第二集再升至23.2點；而另一間電視台同一時段收視為3點，計算CPRP比TVB貴994%。
大台更強調，電視節目的收視並不是隨便由公司決定，而是由3間免費電視台及4A廣告商組成的委員會委任的第三方專業調查公司計算。帖文提到：23.2點代表劇集平均每分鐘都有150萬人觀看；另一個電視台同一時段的3點收視，代表平均每分鐘約有19萬人觀看，「俾咁多廣告費得咁少人睇，CPRP梗係貴啦！」
不過帖文出現後似乎一眾Marketers都不接受，有網民留言指「貴公司嘅marketers炒得，係tvb做過已經係cv上面嘅黑歷史」，亦有人認為TVB的文筆不夠專業，「堂堂一間大企業用啲咁黃大仙下邨街市嘅tone先係匪夷所思」，更有人指「因為唔想target你哋嘅讀者囉」。
中文大學新聞與傳播學院教授李立峯接受本地傳媒訪問時表示，TVB質疑人家為何不選擇收視有22點的電視台，而選擇只有3點的，李指客戶落廣告不一定在最大的，因為也要考慮目標客戶。好似有線電視，是收費電視，又分拆咁多Channel，收視一定無咁高，但可能佢地同人推銷時，會講各個台有乜觀眾類別。
李又說若客戶選擇落廣告在Viu TV，可能客戶認為自己的客戶在這裡，也反映客戶覺得Viu TV的形象是否適合自己公司。李立峰續指，大台也有自己的形象，但現在說收視是否仍似以前咁重要？好多人現在不是實時睇節目。客戶落廣告涉及好多因素，不能概而論。
另外，有一名熱心Marketer於帖子回應不選擇TVB的理由：其一是即使不是TVB去做收視報告，TVB收視報告也不準確，在當前的社交媒體下收視報告已經過時；第二是TVB白的受眾十分狹窄，只能針對某種年齡層的廣告已不合時宜。
其三是明顯其他廣告商在TVB的對手落廣告，ROI比較高，亦更易推廣至其潛在客戶；第四是TVB還是活在過去，就像是個「old seafood」。
專門研究廣告行銷的FB專頁「廣告狂人」，就逐點回應TVB的詰問，例如以收視點成本計，ViuTV的確貴，但TVB的主要觀眾不是客戶想要的層面。《下流上車族》收視高，但客戶落不落廣告不單看收視，還有要看報道數目同網上討論熱度，TVB在這方面乏優勢。
「真係唔使同老闆交代？」呢點，「廣告狂人」指「正正就係要同老細交代，先至唔敢落TVB 。講到尾，收視再高，有生意先至最重要；Marketer 唔係傻，喺低收視嘅ViuTV 落廣告，竟然都返到數，喺ViuTV absolute廣告費平過TVB 之下，喺前者落廣告，其實更抵！」
