黑幫「新義安」同「和勝和」上月底喺尖沙嘴街頭扑車後，Channel絲日前就收到報料話新義安周三（10日）晚喺尖東橋吹雞拎鐵通「刮友」，原來之後仲有下文！兩幫派翌日（11日）凌晨又喺酒吧爆衝突，約30人喺金巴利道互相追打，上演街頭混戰。
網上今日（13日）就流傳事發片段，片長約半分鐘，由3段影片合成。最初見到約20名大漢圍毆數人，其間不停推撞捱打一方；之後有一名白衫男子被約10名大漢追打，被推跌倒地後，隨即遭人拳打腳踢，其後一名大漢吆喝：「走！唔好畀我睇到你」。白衫男企起身後，到旁邊嘅灰衫男子被人襲擊，之後又有幾個大漢衝向白衫男並推跌佢，白衫男再被大漢踢頭，其間有人大叫：「走啦」，眾人就邊爆粗邊散去。
警方表示，前日（11日）凌晨2時38分，接獲多人報警，指金巴利道48號對開約有20、30人打架，有人受傷。惟警方到場後相關人士已離去，案件列在公眾地方打鬥跟進，暫未有人被捕。
上月28日凌晨，新義安與和勝和人馬在天文臺道一間樓上吧發生衝突，兩幫人由樓上打到街外，其後數十名黑衣人包圍着一輛白色私家車狂扑，傳出敲打聲響和群眾起哄叫囂聲。事後有傳媒引消息稱警方高層對此極為震怒，據報油尖警區反三合會行動組經調查後，拘捕11名男子。
