專題報道

網上賣嘢要小心!支票黨存入假票造「假轉帳」呃名酒貴錶 藝人也中招

出版: -
0
網上賣嘢要小心!支票黨存入假票造「假轉帳」呃名酒貴錶  藝人也中招
苦主Terry上月在Carousell放售一支近期熱炒的日本威士忌Hibiki 30 (中文名:響30),騙徒先承諾以轉數快付款,減低賣家戒心,但見面交收時卻臨時改為「銀行過數」,但原來另一邊廂,其同黨在櫃員機存入假支票以製造「假轉帳紀錄」,最終Terry稍不留神就中伏,損失該支價值5萬幾元的酒。
該支威士忌是Terry代朋友在網上放售,放上網一周後,該買家就發訊息來表示有興趣,「佢最初問啲問題都好正路,例如酒嘅condition、開口有無損壞,仲問我係咪用轉數快(付款)添!」Terry相約對方翌日在金鐘港鐵站交收,但見面時,卻發現對方是一名20歲出頭的年輕人,「好後生,佢有打電話,似係幫老闆做嘢,但好奇怪,佢交收時手都震晒,我以為飲開酒嘅人手震,都好正常啫!」
該年輕人簡單驗收後,聲稱其轉數快「唔work」,問Terry取銀行戶口號碼,並稱會以手機銀行即時過數,Terry並無異議,「我諗無所謂啦,都係即時過數啫,佢擾攘一陣就show個交易紀錄俾我睇,幾分鐘後,我亦見自己銀行戶口多咗呢筆數。」Terry一心以為交易成功,將酒交給對方離開,但當Terry將金額轉帳予朋友時,卻發現該筆交易銀碼前面列明是CQM,即是Quick Cheque Deposit Machine(支票機存入的交易),而該筆款項仍未入帳,故他未能轉錢給朋友。
Terry即時WhatsApp問該年輕人,並叫他回來,「最初佢唔肯,叫我打上銀行問,轉個頭,我問完銀行發現真係支票,佢話返嚟,但要20分鐘,但其實睇返訊息時間,佢離開都唔夠10分鐘,佢亦是坐地鐵走,最後佢都無返嚟,亦BLOCK咗我。」Terry再發訊息到買家另一電話,「我話唔見人就報警,當時我都仲信佢會返嚟,但轉頭佢就話我支酒係假,叫我交代,又BLOCK我,我當時覺得9成奶咗嘢!」 直至下午,他發現此筆CQM交易已被取消,才確定自己受騙。他立即報警,從警方口中得知近日接獲大量同類騙案,當中不少涉集團式行事。
原來買家交收時,聲稱以銀行過數,但事實卻是安排同黨在入票機即時存入假支票,以製造假轉帳紀錄,當事主無同時留意戶口的可用結餘一欄,原來並無新增該筆款項,就會隨時中招!最終Terry要向朋友賠償數萬元,「覺得好唔開心,就算你俾返支酒我都無用,預咗假酒,錢亦無可能追得返!」他只希望警方盡快拘人,他亦已將事件在網上公開,希望警惕網友勿再中招。
不少網友近日都分享遇上同類的支票黨,有人損失勞力士手錶,亦有人失去名牌手袋等,更有人當場捕獲年僅14歲當「跑腿」的少女。上年在東京奧運採訪「劍神」張家朗當場向對方表白而聲明大噪嘅體育主持陳約臨,近日亦在ig自爆中招,事件同樣發生在拍賣網Carousell,她原本相約買家見面交收手袋,但對方卻安排年僅14、15歲的兒子出來,「佢(騙徒)WhatsApp問我攞戶口account,過咗支票俾我,我覺得好奇怪,點解帳面有錢,但可(用)結餘無錢,不過我見個細路同我企咗半個鐘,我就俾咗個袋佢。」半小時後,陳竟收到對方WhatsApp,指她的手袋是假貨,她直言無可能,其後再check銀行戶口,已發現支票遭彈票。她直指騙徒「好賤格」,公開事件叫大家小心,亦建議拍賣網要求用戶申請戶口時要實名認證。
其實,警方今年3月就破獲一個支票黨集團,拘捕6人,他們在5個月內騙去逾70人,涉款超過490萬元,包括名貴手錶、手袋及手機等。警方更說,集團會以高薪、即日出糧等聘請年輕人當「跑腿」,呼籲市民要小心。
Channel C App 強勢推出 
立即下載全新手機App
IOS: http://bit.ly/3Lv3Lfp
Android: http://bit.ly/3LyZuYa

新聞有價 記者有格 $128成長計劃
立即訂閱:https://channelchk.com/plan
撐Channel C請記者
一齊為民請命 抱打不平

😎Channel C 廣告推廣和媒體合作​!🤝
誠邀各商戶傾談廣告宣傳和合作推廣;
有意請電郵至:[email protected]

🔥「爆片爆相」返嚟喇!🔥 
一經獨家採用將會獲得由
齊柏林熱狗店送出$50禮券乙張! 
報料:https://wa.me/85264691456
爆片爆相