觀塘區湧現豪裝工廈納米工作室，勢成單身男女同小情侶們熱搶小蝸居，Channel C帶你直擊，即睇！
大堂設計到好似酒店咁，每個單位都設有獨立信箱，用戶入電梯拍智能卡可以直達自己樓層，保安同私隱度都極高。上樓睇，每層都設計到好似服務式住宅咁，相當有氣派。
由於呢幢工廈觀塘道320-322號，牛頭角港鐵站行過去唔使10分鐘，標榜單位全智能操控，用戶未返到去已可以遙距開冷氣，大門又用上電子鎖。最正嘅係，每個單位均設有獨立廁所和淋浴間，難怪吸引到唔少單身男女同小情侶睇樓啦！
雖然發展商講明單位為「工作室」用途，但經紀爆料唔少業主都係長時間工作嘅人，做到攰就索性喺單位度休息，直情係24小時WFM咁款，仲話就算屋宇署上嚟巡都有足夠時間畀你「還原」。
Channel C實地觀察發現，入黑後，工廈特別熱鬧，至深夜仍有多個單位燈火通明，從外面望入去，仲見到唔少家居式佈置的單位，亦有頭戴浴帽嘅用戶開火煮食，但用戶們都好小心，一入屋就拉上窗簾，或窗外用上磨砂玻璃遮擋。
而行過去隔幾幢嘅泉源工廈都有樓層都分間成豪華工作室，不過呢度唔是個個單位有獨立廁，大部份納米單位都要去共用廁所，呢樣較為唔方便，但勝在平少少，亦有唔少吸引力。
不過住喺工廈始終係違法行為，一旦被屋宇署揭發，業主有機會被釘契㗎！Channel C都係提提大家，唔好以身試法喇！
