在距離西貢黃石碼頭約10分鐘船程嘅赤徑，近日驚現隱世「避疫村」，沿海邊走入樹林小徑，左右兩旁都搭建了不少大型帳幕，每個帳幕以樹枝、鐵線圍成籬笆，自成一角，猶如小村莊，有人一住就幾個月，有人更視這裡為另一個家。
「中秋到依家喇，鍾意玩幾耐就幾耐囉，又唔駛返工! 」該婦人去年9月跟家人來露營，暫未想過離開，她指這裡屬私人農田，地主亦歡迎他們前來紥營，「以前(疫情前)呢度無人，好靜，佢(地主)反而想多啲人嚟，熱鬧啲。」她教路只要不涉及建築物，政府都「奈佢唔何」，而地政處和漁護署早前也來巡視，亦沒指他們違法，「總之唔係建築物就得， 如果唔係地政處都唔俾你啦!」
不少人花盡心思佈置其五星級的家，更掛上不同裝飾應節，甚有氣氛，他們又帶來大量生活物資，包括太陽能板、水煲、煮食爐、綿被、甚至自設沖涼房和流動廁所等，有人用炭爐煲水、有人自製可儲電的工具箱，為電燈、風扇、手機等充電。
「我成日都喺到，(一星期)返屋企兩日，坐喺度好似去咗咖啡店，聽吓音樂，飲吓咖啡!」連去年十月颱風「獅子山」和「圓規」，他都在此度過，「主要係依家出唔到去，你去邊度玩吖，戴住口罩。」
他直言多年來四處露營，但疫情後，政府關閉轄下營地，至今一年多仍未重開，令他被迫「滯留」於此，「就係嗰啲(政府)營地唔開，令本身無人去嘅地方，突然咁多人，點解收錢嘅(營地)又開? 市民想玩，要俾錢去玩先有?你估依家好好世界呀!」
他指，在這裡露營雖然可享受大自然，但隨時遇到野豬偷襲，「我被野豬咬爛幾個(帳篷)，所以玩都提心吊膽，(牠們)咁大隻，成隻牛咁! 」因此不少營友在帳幕外圍搭起籬笆，阻止野豬闖入。他指，若「有得揀」，他也選擇政府營地，希望政府待疫情穩定後重開轄下營地，讓人有更多選擇，玩得安心。
