當你以為兩公婆嘅決戰已經告一段落，點諗到踏入2022年，蕾神會再出動？！
星期二（11日） 李靚蕾突然又出po，配合蕾神文學又係洋洋千幾字，重點係指控王力宏帶3個男人去佢屋企，仲試圖硬闖探3個細路，令佢覺得毛骨悚然。
王力宏透過經理人反擊，話李靚蕾想像力太豐富，如果屬實應該報警，又話嗰3個男人係工作人員，一個係做咗12年嘅生活助理，另一個係做咗11年嘅職員，第三個係保鑣。李靚蕾強調結婚只係8年，邊會有12年嘅夫妻生活助理？
有指李靚蕾曾報警，附近派出所都證實咗接過李靚蕾嘅電話，所長問要不要派人過去，但李靚蕾話只係詢問下，要同律師商討，無完成報案手續。
王力宏點解釋呢？噚晚微博就流出一張相，從另一個視覺睇到當日王力宏帶住氣球玩具送畀小朋友，但畀李靚蕾阻擋，佢就將禮物放喺門口就走。李靜蕾ig出po指，王力宏係買網軍帶風向混淆視聽，買網民轉移焦點，指控王力宏用氣球禮物呃佢開門，連門口cctv都畀氣球遮住，話王力宏不斷重複講，「我們帶禮物來了，你先拔掉監視器，然後讓我們進去。」無諗到後面仲藏咗個男人。
最爆嘅係李靚蕾公開王力宏呢幾年買網軍控制微博同ig嘅單據，100萬ig粉絲要50000元人民幣，微博數據維護要6000元人民幣，下面有comment share同like數，仲有link，相中印有帳號1793285524就係王力宏微博。
另一張單係去年6月25號，ig 11號同16號兩個po，6月11號關於美國打疫苗張相，買40000個like、400個comment，6月16號王爸爸寫嘅詩，買20000個like、200個comment。睇返11號打疫苗個po Like數有5.7萬，16號王爸爸的詩Like數2.6萬，有幾多係水份大家計到啦！
有晒證據，呢舖蕾神又贏！老實講，李靚蕾仲有幾多證據喺手真係無人知，未來慢慢唧牙膏放料出來就好笑！
