打工仔每年都要做評核，上司一般都看員工的積極性或團隊合作性等，一些較空泛的指標。但最近Channel C收到廣華醫院病理部兩名殮房服務員X先生和Y先生投訴，指今年5月23日收到一份新SDR，即每年做的「員工發展檢討」內容不合理。X先生表示，「我哋部門整咗個新指引係非常之苛刻！根本無可能做得到！唔想畀我哋轉常額（長工）囉！」
【新聞有價 記者有格 立即訂閱：https://bit.ly/3wGQh7c】
廣華醫院病理部對殮房服務員新制定的SDR「員工發展檢討」分數個部份，Part 1為最基本，在不同項目上，列明要求職員「未出現錯漏情況 ／ 不多於一份的錯誤 ／ 不多於兩份的錯誤」。Y先生認為職員工作時慎謹小心是應該，但畢竟他們不是機械人，難免有「甩漏」，「最近有同事嘅文件被殮房技術員退返嚟，問『睇下自己有咩錯！』原來係寫漏咗日期，早排我自己拖咗地之後簽漏咗個名都捉，簽咗名就證明拖咗地，嗰張紙係我自己睇，我後補都得，但佢都照計我一次錯漏！」X先生直言工作的環境和氣氛都使職員非常不安！
新SDR「員工發展檢討」的Part 2列明是「視為超越工作要求」，Y先生指上司表示他們若想取得Good，便要頂更10次。X先生隨即激動說，「喂！頂更都要有得頂得㗎！人哋唔病假唔有事，何來有10次頂更機會？」Y先生指最無奈的是，頂更分配是由上司安排，意味能否頂更10次以達標，控制權在上司手中。Y先生指頂更其實代表他們要一日工作16小時，「得8個鐘休息，當中仲要搭車來回，第日朝早7點又返工，其他部門嘅人話，其實頂更根本唔可以寫喺評核表，可以同勞工處講，但我哋人微言輕...」雖然Part 2列明是「視為超越工作要求」，但X先生指若不達標，未能取得良好表現，亦轉不到長工。
另一項他們認為不合理的評核項目，是「協助殮房技術員和殮房主任工作」多過10次以上才達標，Y先生認為「協助」是很主觀，「下面列明『視乎所協助工作的性質決定』，即佢哋叫我做一啲嘢，唔滿足佢哋嘅心意都唔達標，好似擺龍門咁樣，協助咗都可以話唔達標。」X先生覺得此項最不合理是他們在能力上協助不了，「我哋嘅職位係無技術性，唔使學識，佢哋係要做文件，根本係幫唔到佢哋，我哋能力係做唔到㗎！」殮房服務員主要工作是到病房接收遺體到殮房，做一些搬搬抬抬或掃地清潔的工作，再者若他們返夜更，而上司返早更的話，就沒有協助的機會，「根本呢啲條件就係刁難！」
他們的SDR是分6級評分，要取得1、2、 3級才算達標，若被評為4、5、6級都轉不到長工。X先生和Y先生指轉長工沒有名額制，一般而言只要做夠三年，無甚麼大錯或遲到早退等，八成的部門都會批准職員轉長工，認為他們的部門是特別挑剔。問到為何他們認為其上司是故意不讓職員轉長工，X先生表示，「我估計我們呢個上司好鍾意弄權，佢要控制人，若轉咗長工就吹你唔漲。」他們透露其上司原來經常針對某幾位同事，「好過份，好離譜㗎，殮房主任曾經拍枱拍凳，用粗口辱罵佢哋！」
他們指過往其中一位同事曾要求轉常額，其上司就安排他到化驗室工作，「佢做咗年幾兩年，都唔畀人轉，承諾咗都唔畀人轉喎！仲有長期年半都係返夜更，嗰幾個同事真係不斷投訴，已經投訴到上咗報紙！」問到他們認為那些同事的投訴是否合理，二人都認為是合理的，「以我眼睇就覺得合理囉！編咗兩個同事長期返夜更，其實係輪班制㗎嘛！長期返夜更已經係唔合理啦！叫人去做嘢，做完之後應承人嘅嘢又唔做，平時又拍枱拍凳又粗口鬧人哋，依啲就已經唔合理啦！」再問是否那些職員的工作能力或態度不佳，二人都表示「唔係」，「初頭無嘢嘅，啲同事又好好嘅，但後期呢個殮房主任，可能因為嗰幾個同事唔刷佢鞋，唔奉承佢，佢就針對佢哋囉！濫用職權，用佢嘅職權嚟欺凌佢哋！」他們更認為新SDR是用作針對該幾名同事。
翻查傳媒報道，獨立媒體在上年7月曾報導「廣華殮房服務員申訴遭集體欺凌」，其中一位林先生在廣華醫院工作10年，投訴被針對和欺凌，感到不安。他在2017年曾要求轉為常額全職僱員，但因為SDR評核只是第四級而轉不到。林先生要求上司解釋原因，上司只是說不符合條件，更把他調到夜更，時間長達一年半。林先生又試過因為放假沒開電話，收不到調更訊息而被指「甩更」，當時一名化驗師要求林生簽悔過書，但林生拒絕。及後，林生向人事部投訴，最終裁定投訴成立。折騰兩年至2019年，林生才成功轉做常額，他跟傳媒說，「你唔埋堆、唔入佢馬房，唔奉承就無得重用，又會被針對。」
X先生和Y先生希望Channel C可以為他們發聲，質疑大型公營機構何以做這種行動，故意留難下層職員，「點解無人監管嘅呢？人事部點解唔監管呢？我哋打醫管局工咋嘛，唔係打上司工呀大佬，雖然上司有權力去分配任何嘢，但都唔好咁過份吖！」他們不滿在醫管局的制度下，為何只有其部門使用這份SDR，「成個醫管局有制度㗎嘛！點解佢可以自己制定啲好過份嘅制度呢？人事部同醫管局又唔出聲！」尤其對「頂更」一項感到不公，「佢咁樣編其實根本係迫人頂更啦！我有5個同事，係咪有50個更畀我頂先？以上喎！即大家輪流，你嗰日病我頂你嗰更，好唔合理㗎嘛！私人時間點解要擺落工作範圍入面做評核呢？點解人事部可以默許？」
Channel C就事件向醫管局和廣華醫院查詢，廣華醫院發言人回覆如下：
醫院管理局有既定人力資源政策，評定員工的工作表現，主管會按實際運作需要和客觀可評核的標準，評估員工的工作表現。若員工對評估過程有任何疑問或意見，可與其直屬上司溝通。醫院亦歡迎職員提出意見，會按程序作出跟進。
X先生和Y先生知悉此回應都嘆息，「我哋邊夠膽同佢講吖...反映係無用㗎！嗰幾個同事投訴咗起碼有十次八次，全部都係有證有據嘅，都無用！仲變本加厲！」他們直言上班壓力很大，很害怕和不安，「唔敢逆佢意，有時佢做啲嘢係過份，都超出咗工作範圍，我哋都唔敢出聲，想轉長工都係為咗安定啲咋。」可能有人會質疑，只要他們乖乖的捱3年便可，但他們不認同，「3年都唔pass吖嘛，點捱呢？甩漏做得唔好就評第5級，錯兩次後再頂更也沒有用，因為最基本都錯咗，如果兩年三年都評為第5級，咁咪炒魷魚囉！」又可能會有人問即是沿用舊SDR，上司都可以不讓職員轉常額，「舊SDR理據唔夠吖嘛，新呢份寫明你唔可以錯兩次，佢就可以話『依家錯三次喇！咁我點畀你呢？』係咁樣！」對於能否轉到其他醫院或再考其他部門，他們都認為不可行，「上司好衰㗎！成日唱衰我哋啲同事，其他部門聽到係廣華殮房，都怕咗我哋啦其實，邊個夠膽請我哋？」Channel C感受到X先生和Y先生的無奈，可惜能幫忙的不多，只可以報道出來讓大眾知道，是否不合理？是否不公平？由公眾定奪。
