疫情好轉，政府放寬限聚，上周四（21日）重啟晚市，大部份行業都可以重開，以為有點希望嗎？事實似乎有落差。最近Channel C收到很多美容業界的投訴，指政府即使放寬重開，都根本難以開業，原因是第五輪和第六輪抗疫基金仍未批出！
Channel C訪問了兩位美容業界小商戶A小姐（化名）和李小姐，均指2月已經入表申請抗疫基金，但至4月22日（訪問當日）仍未有消息，A小姐說，「日日睇電話check住，日日聽到sms聲就以為有消息喇！」她們曾多次致電基金查詢熱線追問審批進度，但回覆是大部份是「不知道」、「我哋唔係審批部」、「你等多兩個星期吖！等啦！」，甚至「你哋頂唔到嘅，你咪執咗佢囉！」A小姐形容申請過程如乞討，「真係𠼮契弟咁樣，乞兒咁乞啲錢返嚟，我哋真係好慘好難受！」她又形容如在熱鍋上的螞蟻，既不能結業，又沒資金繼續營業。
A小姐現時仍欠業主兩個月租金，正等待基金資助以還清債務，她知道不少同行捱不住已業主，或因欠租而被業主追討，甚或恐嚇，「大家都真係指意晒基金嚟交租，或者開支，或者出糧，我哋用盡晒積蓄，好似依家開返，都根本唔敢叫員工開工，點出糧呀？」 李小姐不滿政府多月來「拖字訣」，由申請至訪問當日已等待了9個星期，「係唔係真係要搞到咁慢呢？」A小姐認為政府要了解美容業界不是「攤大手板問政府要錢」，業界是很想自食其力，只是政府要求強制停業，「政府做咗啲乜嘢呀？佢個承諾去咗邊度呀？唔好刁難我哋啲小商戶啦！」
Channel C上周五（22日）與她們做訪問後，即日就她們的個案向政府查詢，兩日後（24日）政府的回覆竟然有確實答案，電郵回覆內容是「已完成審批，日內會透過手機短訊及電郵將申請結果通知申請人」。我們隨即通知A小姐和李小姐，李小姐很開心指收到獲批通知，但很可惜A小姐的結果不獲批，現正上訴。政府透過電郵回覆亦解釋了審批情況，指「會先處理在之前數輪計劃成功獲批資助而並無業務資料變更的處所申請，計劃秘書處目前已處理了接近9 000宗申請。其他涉及更改業務資料及首度申請的個案則需要較長審批時間。在審批過程中，計劃秘書處會檢視文件以判斷相關處所的開業日期、業務性質、是否仍在營運，以及同一處所是否有重複申請的情況等。」
對於今次美容業界叫苦連天，香港美容業總會創會主席葉世雄都指對政府很失望，「之前同財爺（陳茂波）反映，希望今次資助更多或改良方式，答案就話唔會改任何嘢，因為咁先可以快，話係急錢嚟嘅，如果再改就好慢，救唔到急，咁依家都救唔到急。」他又回應政府指首次申請的個案審批較慢，但以他所知，業界的新增店舖不多，尤其距離上次資助只相隔約一年，年間並沒有美容院湧現，即大部份應為之前成功獲批資助的個案。
對於有美容業界不滿「結業就不獲批資助」，令小商戶處境進退兩難，認為政府補償業界在停業期間所受的損失是理所當然。但葉世雄就解釋，基金是資助非補償，「補償就係佢做錯嘢補畀你，資助我哋要多謝佢，感謝你資助我喇！」他解釋抗疫基金是資助公司繼續經營，若公司結業就達不到目的，則沒原因發放資助，葉世雄認為不合理的是資助審批時間，「等如我等藥去救命嘅，係會畀藥你㗎，你放心啦，你等我啲藥啦，但係等到個病人死咗都未有藥，4個月都未批到係咪合理嘅時間呢？依家係救急錢嚟㗎嘛！」葉世雄又憤指不明政府為何每次都要求美容界停業，「我哋美容行業由第一至第四波嘅爆發都係零確診，反而從來無爆發嘅行業每次都畀佢停，我哋係諗唔明㗎！」他又指曾爭取過資助以停業時間計算但不成功，「髮型屋停28日，基金都係計一次，我哋停3個半月，又係計一次，應該每停14日有一次資助咁計！」他覺得政府凡事都不是有商有量，很荒謬！
