今晚（23日）7時許在亞皆老街雅麗居對出發生交通意外。一輛私家車翻轉四轆朝天，司機能自行離開車廂，前座兩邊玻璃窗碎裂，後方還有兩部私家車也相撞，警方和救護員都接報到場。直至晚上9時許，事發路段仍然有三線封閉，原來意外竟然接二連三！
【新聞有價 記者有格 立即訂閱：https://bit.ly/3wGQh7c】
有住附近的女街坊接受Channel C電話訪問指，事發時正在家中吃飯，突然看見窗外有閃燈，便走近窗邊看看，「睇到樓下亞皆老街有架黑色車翻轉咗，警車到咗，另外有架白色車喺側邊，佢貼住架泊喺路邊嘅紅色私家車，呢個應該係第一宗交通意外。」女街坊指由於意外後警方要封路，相信因為爭位而發生第二宗相撞意外，「睇唔到點發生嘅，因為食緊飯途中又再睇，點解越來越多警車嘅呢？然後就見到一架白色車同一架黑色車撞咗，過多陣又見到一架貨車同一架黑色私家車又撞，就係第三宗意外。」她指直至晚上9時交通仍未暢通，「事發地點係四線行車，依家得返一線，翻車位置喺路邊數過去第三線，然後白色車喺第二線，所以得返快線行車。」
Channel C向警察公共關係部查詢，指晚上7時12分接報，在亞皆老街180號有三車相撞意外，其中翻車的涉事司機清醒，報稱腳痛和頸痛，另外有一位司機都報稱腳痛，救護員到場治理。意外後44分鐘，在7時56分警方再接報，在同一地點有兩輛私家車相撞，無人受傷。再過約10分鐘，至8時07分再接報，一架輕型貨車與一架私家車相撞，輕貨司機報稱頸痛，輕貨男乘客則報稱腳和背痛。
