近日網上流傳一條影片，顯示在地鐵車廂內，有一對男女大聲指控一名男生性騷擾她。男生否認，稱只是見女方獨自一人在月台踎下感好奇而望了一眼；在該對男女逼迫下報警，待列車駛至粉嶺站時，一同離開車廂到大堂等候警員到場。
發貼文的網民形容該對男女為「公主」和「王子」，又稱對他們的行為「睇唔過眼」。「公主」不斷以高音刺耳的聲線大鬧該男生性騷擾，又多次質問他讀哪間中學。「公主與王子」更不時在對話中夾雜粗口，又手指指，並步步進逼。
Channel C率先找到片中被「公主」指控性騷擾的16歲鄭同學和他的媽媽，向大家剖白。
鄭太：
原來阿仔在大堂，好慘，哭着！好無辜地、眼濕濕的向人解釋整件事，但女方仍不斷發癲，想向阿仔衝前，那一剎那我就覺得好心痛！
鄭同學：
被人冤枉，很不開心。因她男友一來就不斷說粗口，不斷鬧我，不斷將胸口靠近我，我都驚。
案發是1月21日晚上11時許，鄭同學與朋友打排波後，在上水乘搭港鐵東鐵綫回家，落到往金鐘方向月台，行去車頭找座位時......
鄭同學：
有個女生踎下，我看了一眼，我照直行，無理會她。發現車頭無位便快些行回車尾方向找位坐，有再經過該女子，我都有看了一眼。未上車時，她男友在後方用粗口說「望咩呀望」。到上車後，他們在車頭方向走到我們位置，就發生了片中的事。
而片中他們的對話如下：
公主：你係咪性騷擾
王子：望乜L嘢呀而家
公主：係咪搞性騷擾？報警！而家就報警
鄭同學：報警啦咁
公主：好呀
鄭同學：你坐喺笪地度，我睇一眼
公主：你睇一眼
王子：望乜L嘢呀而家
鄭同學：望吓都唔得
公主：邊間中學㗎
王子：問候你娘呀
公主：係喎！邊間中學㗎
這時，警方接聽了鄭同學的電話。
鄭同學：我啱啱喺上水火車站喺月台嘅時候，有個女仔坐喺笪地度，跟住我睇咗一眼
王子：咩嘢叫做坐呀
鄭同學：咁你啱啱係點㗎
公主：我係踎喺地下，我唔舒服M痛，所以踎喺地下，你性騷擾我
王子：喺粉嶺站落我哋，等你
鄭同學：喺粉嶺站度落得唔得呀，係呀
公主：望乜9呀
當鄭同學一掛線，「公主」就即刻發表她與別不同的法律觀點。
公主：你知唔知性騷擾嘅定義係咩呀
鄭同學：係咩呀
公主：就係你任何行為、任何語言、任何眼神，令到女方覺得唔舒服、被威脅、被攻擊，就係性騷擾！明唔明白？明唔明白？知唔知道？
鄭同學：等警察叔叔嚟判啦
公主：冷靜乜嘢呀
王子：乜嘢呀而家
公主：你係女仔咩？你知道1個女仔，喺1個地鐵車廂度
鄭同學：等警察叔叔嚟判啦
公主：被唔禮貌嘅眼神望住，有咩感覺呀？1個女仔，自己都算喇，佢有男朋友，你都夠膽望
王子：喂！你望咗幾多次呀頭先
鄭同學：吓？你咁樣踎喺度，望你都唔得？等警察叔叔嚟判啦
王子：落車啦
鄭同學：落吖，一定落㗎
「公主」等待警察來時，因為不斷大叫，還指鄭同學非禮她，引來很多途人圍觀。鄭同學惟有哭着向途人解釋：
我望咗幾眼，佢就話我性騷擾啦！你哋個個行過去，你哋都會睇吓佢發生咩事啦！跟住佢就上咗車廂，佢就過嚟同我講，佢踩過嚟就話我性騷擾佢啦！你哋大家覺得有冇問題吖？跟住我而家已經報咗警啦！
鄭同學說有街坊見「王子」在恐嚇他和想打他般，都有再幫他報警。亦有圍觀者叫他不用怕及遞紙巾給他抹眼淚。
鄭同學：
一開始很多人看，很有壓力，我又無解釋件事，別人就真的覺得我性騷擾這女子。很有壓力，很委屈，一開始不知怎算。
港鐵指，職員有嘗試勸止他們。而警方初步調查指，爭執是源於該名26歲女人在月台踎下時，被行過的16歲男生望了一眼，她的33歲男朋友就鬧男生。鄭同學說這對情侶向警方說要他道歉，但他堅持無錯，無道歉。警方就指雙方試過和解，但未能擺平，案件只列作糾紛。
不過這樣處理，鄭同學凌晨1時才能離開車站；而且因為打波弄傷，翌日都無上學，鄭太一度擔心仔仔情緒。幸好仔仔覺得自己無做錯，所以都無鑽牛角尖，平伏了心情。
鄭太：
我今次接受你訪問，就是想阿仔可以還原真相，說整件事給人知，整個事發經過，還仔仔一個清白，事後我不會再有追究。
至於為何不追究？其實鄭太都同情公主。
鄭太：
該對情侶現時已得到懲罰，這麼多人知道此事。
不過這個經歷，鄭同學都多了心理陰影。
鄭同學：
以後可能不會再這樣看，就算任何事再不會再理。
鄭太聽到仔仔這樣說卻有點擔心，她認為有些人真的需要別人協助和幫助，因無人幫助會好慘，所以會再向仔仔解釋和傾談。不過這件事，都看到仔仔冷靜處事的一面，鄭太亦感到安慰。
鄭太：
由細到大都教他，自己無做錯的事，要清清楚楚向別人說。遇到強權，自己不要屈服，讓人知道真相，解釋給別人知，我無做過。我是媽媽，若我被冤枉，我未必有他般冷靜。他可做到這麼冷靜，我覺得他好叻仔！
我們就此事件向大律師陸偉雄尋求法律意見，到底鄭同學的行為能否構成性騷擾？
陸偉雄：
突然間你看到一個人坐在地上，都會望一望看看那人是否不適，這不能即刻解讀為性騷擾，別人可能只是幫你。法律的要求，不是你個人感覺，是要客觀的標準。即使當事人認為今次我是不安，可能你是比較敏感或會錯意。最多可向平機會舉報，如果平機會覺得有案，是用民事程序起訴。
