中西區足球隊喺2013年至14年球季開始由馮振霆教練接手，球員班底係佢由執教中學果陣開始組織、由街場比賽踢起嘅青年球員。到咗2018年至19年球季，中西區首次升上甲組聯賽角逐，連續幾季都排名聯賽榜中游，援將亦只係有嚟自澳門嘅吳鏵昇。
嚟到今個球季，呢支球隊得到張震康先生成為贊助人後，銳意加強陣容，開季前簽入咗有港超經驗嘅球員包括許宏鋒、安基斯、梁子駿、曾健晃、外援盧斯安奴、小港腳張哲恆、青年門將陳冠燊、法國中鋒布蘭克，球隊實力大增，搖身一變成為爭標份子。
中西區今季嘅奪冠之路，由開季1:0擊敗黃大仙開始，佢哋季初同駿英九龍城鬥得非常激烈，11輪比賽之後兩隊同分。12月中，中西區「加碼」簽咗原本分別效力港超標準流浪、和富大埔嘅大衛巴拉、安達，球隊實力進一步增強之後，以11勝2和排喺榜首完成首循環賽事，積分比接連喺第12、13輪比賽失分嘅駿英九龍城多5分。
通向冠軍嘅路途望落去平坦，其實暗藏考驗，中西區喺第15輪比賽2:3不敵凱景、第16輪0:0悶和佳聯元朗之後，優勢減少到3分，不過之後駿英九龍城同愉園4:4打和，就令中西區再次揸住5分嘅勢。
第17、18輪比賽對中西區嚟講非常重要，因為由1月中開始球隊表現起伏不定，而呢兩輪嘅對手東區同埋高力北區，唔單只有外援助陣，本地球員班底亦都唔弱，令中西區都受到一定程度嘅考驗，好在隊中兩大射手保持水準，大衛巴拉喺對東區果場大演「帽子戲法」，許宏鋒就喺對高力北區果場一箭定江山，幫球隊喺兩場硬仗都以1球差距贏波。
領導層、教練、球員上下一心，幫助中西區球隊可以喺短暫嘅低潮過後重拾自信，4月嘅兩場硬仗，大衛巴拉包辦兩個入波幫球隊2:1擊敗南華，而許宏峰、安基斯嘅入波加上對方擺烏龍，中西區得以3:0擊敗排名第3嘅沙田，喺剩返兩輪比賽之下仍然領先駿英九龍城5分。
嚟到5月7日嘅第25輪聯賽，中西區同爭標對手駿英九龍城正面交鋒，比賽結果關乎冠軍誰屬，可惜天公不造美，場波踢到12分鐘就因為雷暴而要按球證嘅決定暫停，之後場地管理人員嘅出嚟通知要封場，賽事要延期重賽，令到中西區提早捧盃嘅大計要押後。
一星期之後，中西區喺5月14日下晝作客葵青，呢場原本係今季甲組聯賽最後一輪嘅比賽，就成為中西區提早捧盃嘅另一次機會。
開波之前已經見到中西區球迷坐定定喺度，場邊仲準備定香檳。不過，葵青都唔想喺主場任人魚肉，雖然首循環佢哋輸俾中西區8球咁多，但返到主場就零舍醒神，而且士氣十足咁去抵擋中西區嘅攻勢，見到平日橫衝直接嘅大衛巴拿呢場波都冇啖好食，就睇到葵青幾咁頑強。
好在，中西區仲有射手許宏鋒，呢位踢過港超嘅昔日小港腳，上半場接應沈耀揚嘅傳中，近門頭鎚一Fing，就為中西區打開紀錄。葵青都唔係完全冇進攻能力，不過球員嘅埋門處理都係爭少少，始終冇辦法追成平手。
到咗補時階段，中西區右路界外球攻勢，接應嘅許宏鋒轉身射個「三分波」，靚到葵青門將都係得個望字，中西區贏到2:0，冠軍基本上都到手喇。
隨住球證雞聲響起，中西區亦都成為咗今季甲組聯賽冠軍，馮振霆教練帶隊十年，亦都終於圓咗冠軍夢，呢個亦係中西區喺足總賽事嘅首項錦標。
