網上流傳一段影片，指控粉嶺樂業路流動採樣站一名職員疑似賣籌，Channel C本住「為民請命 抱打不平」嘅精神問過租借流動車間公司，回應指女職員只係派籌非賣籌。
租賃流動車公司醫堡健康護理負責人吳小姐話有睇過網上條片，「我估計佢係派緊籌，唔係收緊錢，見佢派緊嘢，無見佢收錢。」佢話公司只係提供車畀人用，都要問返衞生訪護中心先知係分子病理使用。傍晚6時許，醫堡再回覆我哋指，已經搵到涉事檢測公司嘅女職員，話件事係噚日發生，個女職員係負責登記工作。由於檢測車只係停2個鐘，該女職員就向排隊人士派籌，強調佢無收錢。
就住賣籌呢個行為，我哋問過陸偉雄大狀，希望提醒一下，賣籌有可能觸犯公職人員行為失當。陸大狀指公職人員行為失當呢條法例不止於公務員，「任何人行使緊一個公務，我哋都視之為公職人員，如果期間收錢，嚴格嚟講係公職人員行為失當嘅行為。」佢話另外亦可能觸犯行賄，「任何市民畀錢都可能行賄，畀錢職員換籌，就違反咗防止賄賂條例。」公職人員行為失當及賄賂最高刑罰係監禁七年和罰款，大家切勿以身試法！
除咗賣籌疑雲，網絡都出現排隊黨搵食，喺二手買賣平台Carousell有人出po可以「強檢代排隊」，有啲寫各區，有啲指明九龍區、長沙灣、土瓜灣、馬鞍山等，有po寫住「1個鐘80蚊，仲有去廁所代排，1次30分鐘35蚊」。不過，呢類po隔一陣就會死link，Carousell回應我哋查詢就話平台會刪呢類po，只准交易實體產品，如果產品違規就會刪除，如果多次違反刊登條例，會有相應行動。
噚日有錄音指有工人姐姐確診後，醫院叫姐姐返屋企嘅問題，今日袁國勇去電台做訪問似乎講咗解決方案，「病房根本無病床，醫護點接收呢？喺急症室8個鐘都幫唔到你，如果有發燒或者抗原測試係陽性，唔好去急症室，去每區自己嘅政府門診，護士睇過無乜嘢，畀個樣本瓶你返屋企，畀埋說明教你咩情況下真係要去急症室，有咩情況喺屋企飲多啲水、食必理痛，可能幾日後無乜事，再居家隔離多5至7日，基本上抗原測試係陰性就可以出返嚟。」但有市民都擔心確診者回家會傳染屋企人，袁國勇就建議，「盡量食飯暱埋一角，喺房裡面食飯，出嚟就戴兩個口罩，屋企所有人都戴兩個口罩，一個外科口罩，一個外面布口罩，田罩要貼晒塊面，喺屋企唯有係咁做！」又建議感染者最後先沖涼、洗臉，就更加安全性咁話。
