Channel C收到瑪嘉烈醫院的殮房職員投訴，指3月24日下午3時半，痛失愛兒的深水埗區議員麥偉明疑似運用特權，要求殯儀土工在醫院殮房為仔仔麥浩謙穿衣和化妝！
瑪嘉烈醫院殮房職員李生（化名）指，3月24日將一位叫麥浩謙的年輕人遺體交給他的家屬，該遺體被標為「黃標」，意思是屬屍體分類第2類，指患上具傳染性風險的疾病而離世，當中包括愛滋病、丙型肝炎、沙士、禽流感、中東呼吸綜合症、2019冠狀病毒病等。李生指醫院有指引，黃標遺體是不可以開屍袋，「遺體有兩個屍袋包住，最底層係透明，外層係實色，我哋多數只會開外層畀家屬確認遺體，不可以喺醫院開內層透明膠袋做任何儀式，例如著衫、化妝、拜祭等。」而該家屬認完屍後，殮房職員就突然發現，殯儀館有人企圖開內層的透明膠袋，殮房職員立刻過去喝止：「喂！唔可以開！呢個係黃標，係唔可以開透明膠袋！」殯儀工人就回應話，「我都唔知，我都係受order，我都唔想開，佢黃標，我都唔想開。」
殮房職員立即找麥偉明說明，指醫院範圍是不可以開黃標遺體的透明膠袋，麥偉明當時都表示明白，但說：「話咗可以開，可以幫我個仔化妝著衫。」李生話隨後就有位較高大的殯儀中介人士走來，跟殮房職員說，「佢係區議員嚟嘅，亦都同上面講咗，佢個仔今日就要喺醫院呢度著衫化妝，因為殮房出面佢啲朋友、同學都嚟齊晒，所以唔想就咁包住個膠袋。」殮房職員聽後致電上級，最後就批准他在醫院範圍開袋。李生指當時就有三位殯儀工作人員在房內為遺體穿衣化妝，殮房職員都不敢進去，「真係有化妝同著衫，佢開返門我哋會見到，已經係打開晒膠袋，著晒衫化晒妝。」事後，殯儀工作人員更把遺體推出戶外空曠地方，「你知道而家嗰情況就係排住隊接遺體，現場其實好多人，呢個遺體係黃標，係完全曝露晒喺咁多人之中，包括後面排緊隊嘅家屬同埋其他工作人員！」
李生解釋黃標遺體其實是可以裝身及化妝，但不可以在醫院發生，可以在殯儀館做，但工作人員都穿保護衣物，他怒指，「依家呢個Case就係麥偉明同中介人士，要求喺醫院做呢件事，變相我哋啲職員覺得好無辜，同埋啲土工都話唔想開，話平時成包放入棺材封棺，但因為佢哋話佢係區議員，亦都話同咗上面講咗，咁我哋做細嘅無聲出，我就覺得係咪有特權呢？」李生指最擔心是先例一開，之後其他家屬都會要求這樣做，「第一次之後就會有第二次，因為就係打個電話，嗰個中介嚟講話佢係區議員，之前同高層講咗要喺度做儀式，咁之後人人都話要開袋，其實我哋好高危！」
我們就事件向醫管局查詢，瑪嘉烈醫院發言人回覆如下：
鑒於現時疫情嚴峻，為方便家屬盡早從簡完成先人的身後事，在切實可行及情況許可下，醫管局自三月二十一日起，容許公立醫院提供地方予所有去世新冠患者的家屬，在合理時間內為遺體進行化妝、裝身及瞻仰遺容之用。因應疫情嚴峻，為減少傳播風險，在保障家屬及員工安全的前提下，公立醫院會按實際情況及操作，作出彈性安排。醫院員工須遵守由衞生署訂定的「處理及處置屍體時所需的預防措施」相關指引處理病人遺體。
本院根據醫管局的最新安排，在三月二十四日下午三時許，安排一名死者家屬領取遺體，該遺體類別為「第二類」。醫院按照相關指引，提供一個室內密閉房間予殯葬從業員及家屬為遺體進行化妝、裝身及進行儀式等。在進行上述程序時，只有病人家屬及受其委託的殯儀從業員在場，並無其他死者家屬或陌生人。
本院重申是根據最新指引作出上述安排，本院在處理親屬領取遺體事宜時均一視同仁，亦無過問家人身份。就上述個案，本院殮房員工並不知悉死者家屬的身份，亦沒有作出特別安排。
殯儀館職員於領取遺體前一天（三月二十三日），已致電本院殮房查詢是否可為新冠死者化妝及裝身，當時殮房職員已告知殯儀館職員在新安排下是容許的。而所有遺體均已加上正確的身份標籤和分類標籤，上述死者的遺體亦清楚加上「第二類」標籤。遺體移交予殯儀館職員時，遺體亦已放入雙重屍袋內。
李生得悉瑪嘉烈醫院的回覆後很憤怒，指醫院「一定係講大話！」他首先回應3月21日醫管局的新指引，雖然他們從未收過指示，但仍可當作是醫院內部有問題指引錯誤。但李生指化妝和裝身雖然在密閉空間做，但他們之後在無封棺、無膠袋的情況下把遺體推到戶外，讓非家屬人士即可能是先人的朋友瞻仰遺容，封棺之前亦沒有雙重膠袋，「同一時間我哋接另一個家屬個案，嗰陣我哋見到推咗出外面，一定無雙重膠袋，係一定無！我哋見到！」
Channel C再有收到其他讀者提供的相片，情況跟李生所形容的一致。
李生再透露，有土工指這個案是因為新冠肺炎而離世，所以土工來到時已穿好保護衣，而事實上，今次件事連殯儀業界都不滿。有殯儀業界人士反映，「其實醫院殮房我就唔知點解可以咁樣，唔明點解仲要提議話開袋去做化妝，或者甚至乎著衫添，我覺得真係好危險。」又指，業內有遺體化妝師或仵工同行都不想做新冠肺炎的個案，「佢哋話愛滋、肝炎或者瘋牛症都敢做，但新冠肺炎真係完全唔敢做，認真講！中梗嘅！做嘅話要接觸遺體啲分泌物各樣嘢，我可以好肯定咁同你講中梗嘅！」雖然根據衞生署指引屍體分類第2類，即黃標是可以在殯儀館裝身及化妝，而部份家屬當然都有這方面的訴求，但業內人士就覺得連保護衣都要自備的情況下，配套根本不足。Channel C有就事件向麥偉明查詢，但他可能忙於辦身後事，在截稿前都未有回覆。
記者後記：
老實講，我哋做呢篇報道時都有所掙扎，畢竟麥先生失去至親，心如刀割，但考慮到疫情之下，好多香港人都同樣經歷緊呢種痛，一樣好迫切，想好好送親人最後一程，有邊個恩恤過佢哋？而同一時間，都有人想好好保護自己和家人，佢哋都需要發聲嘅渠道。的確，指引不外乎人情，只要顧己及人，相信大家都會理解和體諒。Channel C在報道之餘，唯一可以做的只有向麥偉明先生致以慰問，希望他節哀順變！
老實講，我哋做呢篇報道時都有所掙扎，畢竟麥先生失去至親，心如刀割，但考慮到疫情之下，好多香港人都同樣經歷緊呢種痛，一樣好迫切，想好好送親人最後一程，有邊個恩恤過佢哋？而同一時間，都有人想好好保護自己和家人，佢哋都需要發聲嘅渠道。的確，指引不外乎人情，只要顧己及人，相信大家都會理解和體諒。Channel C在報道之餘，唯一可以做的只有向麥偉明先生致以慰問，希望他節哀順變！
