禮拜日有讀者向我哋報料，姐姐葉劉淑儀去咗養和做檢測，當時醫護問點解要做，姐姐就答係有同事嘅屋企人中咗招，都好耐無見嗰位同事。當大家以為唔使擔心姐姐之際，今日就有傳媒報道話，葉劉嘅司機初步檢測呈陽性，所以姐姐今日要缺席行政會議。姐姐今日同噚日都有出PO祝大家元宵節同情人節快樂，Channel絲都祝姐姐身體健康啦！
另一位需要市民擔心嘅係政務司司長李家超，佢屋企有位外傭做快速測試，又係呈陽性，為咗安全起見，司長已經居家隔離。雖然李家超同屋企人做快速測試結果都係陰性，但千祈唔可以掉以輕心，要聽袁國勇話，喺屋企戴兩個口罩，好好保護自己呀！
仲有一個危機就係我哋嘅特首林鄭月娥，因為特首辦有一個職員速檢初步陽性，喺潛伏期內即噚日都仲有返工，好彩嘅係無接觸林鄭。大家都知道林鄭開記招唔戴口罩，萬一林鄭中招，各位記者就有感染危機！作為大台嘅TVB記者就問特首，「林太去到今日都係堅持想畀市民感受你嘅情緒，就無戴到口罩，有啲意見就話無辦法樹立一個好嘅榜樣，點樣回應？」林鄭就話希望大家唔好再糾纏喺呢個議題，依家係需要同心抗疫。
TVB記者寸特首，其主播陳嘉欣就將警員讀錯「警犬」，畀網民鬧佢侮辱同唔尊重警員，仲發起一人一信行動向通訊局投訴。通訊局回覆Channel C指截至2022年2月11日一共收到約500宗相關投訴，投訴人主要認為一名主播喺報道有關疫情新聞時，對警察作出侮辱性嘅稱呼，局方會按既定程序處理有關投訴。
提起警員，國安處今日再有行動拘捕2名男子，多間傳媒報道話其中一人係藝人阮民安，但李桂華開記招就以「41歲歌手」稱呼，話佢涉嫌犯具煽動意圖行為罪及洗黑錢條例，另一個20歲無業男子 就以洗黑錢條例拘捕。李桂華喺記者會舉例指，41歲男子喺上年11月嘅網上直播演唱會中親自唱首歌，歌詞有「光復香港 時代革命」，另外亦有圖文並茂咒罵法官，指會引起對香港司法嘅憎恨。李桂華又再舉例指其杯葛防疫措施，話「接種疫苗會死人」。而洗黑錢罪名就涉及社運籌款約100萬，存咗入20歲男子戶口，當中涉嫌有15萬作私人用途，以及27萬入咗馬會戶口作投注用途。有記者問反對防疫措施同專家意見到咩界線屬於煽動，李桂華就話被捕人講嘢同政府背道而馳，話打針會死係冇用，係激起人憎恨政府，但會徵詢律政司意見，研究是否足夠送上法院。
