12月29日周三朝早6時，大欖附近嘅屯門15度，好多人住嘅大埔14度，同樣有好多人住嘅沙田、將軍澳同好多人返工嘅觀塘16度，都屬於清涼。根據天文台準則，13至17度係清涼，8至12度係寒冷，7度或以下係嚴寒，但Channel絲身體嘅準則，話今朝係嚴寒。
香港吹住由大陸嚟嘅偏北氣流，風唔算好大，吹唔散啲污染物，形成煙霞，維港下午灰蒙蒙一片，由朝早6時開始唔夠半日，好多個區嘅PM10同PM2.5濃度都飆升幾倍，平均24個鐘計，仍然超出世衞建議上限，今日可以話係烏煙瘴氣，甚至令人有種透唔到氣、窒息嘅感覺。
未來天氣預測，越近北面，氣溫仲係寒冷，好似部份地方曾經係禁區、香港幾乎最北嘅打鼓嶺，禮拜四同除夕朝早可能跌至11度，即係寒冷，大家記得要好好保暖，好好保護自己。
香港受大陸乾燥嘅東北季候風吹襲，市區早晚都係清涼，仲乾燥，除夕晚到元旦朝早東北風仲會增強，離岸地區吹到強風，雲量又會多返啲。
陰雲不散，即將告別 2021，星期五就係除夕，未知大家會否外出倒數，或者留喺溫暖嘅家中，都係一種幸福。寒冬之下，最緊要係互相關心送暖，記得多啲問候身邊嘅人！
