所謂「好奇害死貓」，好奇心極重的小編K深明此道；以往收看「好奇五先生」的曱甴實驗片，仍能面不改容，怎料當接過大埔曱甴屋的高清曱屍相時，才開始後悔自己的好奇心太強，相信不少讀者都一樣。但本身很害怕曱甴的當區區議員何偉霖，卻帶同義務滅曱隊頂硬上，勇闖這個正在供養逾萬隻小強的300呎曱竇，希望將其一舉殲滅，還街坊已闊別逾10年的衞生環境。
【何議員接受旁白師電話訪問原句節錄】
「滅蟲公司話，好多惡劣單位我都做過㗎喇，你放心啦，冇問題嘅。但當佢哋入到去，都覺得好棘手，仲話『前所未有咁悽慘』。」
「我擺嘅相，其實只係（屋內）一小部份嚟㗎啫。佢成間屋，基本上你摷開啲嘢，全部都係（曱甴）嚟㗎喇……全部都郁㗎，仲要係好大隻……當佢一掀開啲嘢，即係啲雜物，（曱甴）就開始飆出嚟喇。」
「對上一次，佢家人執屋，啲曱甴跑晒出走廊；今次好多未跑到出嚟，已經死咗喺入面喇，變咗（屋內）成地都係（曱屍），尤其廚房最嚴重……鄰居掉出嚟啲垃圾，佢好鍾意拆開，睇吓有冇啲食剩嘅嘢，佢就攞番去食；但啲垃圾佢攞番去，就掉喺廚房個位，堆到滿晒出嚟㗎喇……好多袋，變咗嗰度係個溫床囉。」
「打開咗個渠房，入面……嘩！即係有啲水浸住啦，跟住又有啲曱甴喺度浮浮沉沉、郁吓郁吓咁樣，嘩！真係……好震撼，我都唔敢影相，因為你行入去嗰個位，基本上已經成身都係（曱甴）㗎喇。」
「（曱甴）有爬過落（我）條褲度囉，但係我真係搞唔掂，都要即刻跳番出嚟，真係太過惡劣喇。佢哋做緊嘅人（滅蟲隊），基本上成個身都爬滿晒（曱甴）㗎喇。佢哋行出嚟休息時，我同滅蟲嗰個人講講吓嘢，（對方）喺身嗰度、喺頸嗰啲罅位，都爬幾隻好大隻嘅（曱甴）出嚟。」
「以前我唔知咩係『曱甴味』，但今次我入到去就知道。我問滅蟲公司，呢啲係咩味？點解咁臭、咁難聞嘅呢？佢話呢啲咪『曱甴味』囉……即係又醙、又酸、又臭，嗰祲味好濃烈，我真係無法用言語去形容呢祲味。」
「滅蟲公司同我講，（屋內）可能有幾萬隻（曱甴），而家未完全清晒，我覺得都過萬隻㗎喇。你淨係見到大（隻）都咁多啦，啲細嗰啲呢？」
「喺咁緊急、咁危害到公眾健康、咁嘅衞生情況，你（政府）都唔肯酌情處理（曱甴屋），你要我哋搵坊間嘅慈善團體同義工去處理？咁如果冇義工去處理，最後點呢？件事就擺喺度，唔處理？所以點解長年都冇解決到呢個問題；由佢租嘅時候，經過咁多住戶去投訴、去聯署，點解嗰陣時又唔處理呢？仲要最後賣埋個單位畀佢？」
最後，Channel C要感謝何議員和滅蟲商Nobedbugs-HK，為一眾居民衞生着想，勇敢搗破曱竇！
