「大S」徐熙媛同汪小菲10年婚姻告終！雙方今日（22日）透過律師發共同聲明宣佈離婚，而且已辦理手續。據報佢哋將針對名下合共9.5億新台幣（約2.6億港元）家產，同埋一對子女日後相處方式事宜調解。有內地網民就形容汪小菲係「第一個因愛國而離婚的男人」；亦有唔少網民就話「剝蝦之戀結束了」，大S以後就要自己剝蝦喇！
大S同汪小菲今年6月爆出離婚傳聞，大S更單方面宣佈離婚，不過汪小菲、大S奶奶張蘭同S媽都先後多次澄清無咁嘅事。到9月汪小菲低調去台灣一家團聚，有指係挽救婚姻，不過今日台媒報道當時汪小菲來台係同大S談離婚，大S之後到本月初告正式向法院入紙申請同汪小菲離婚，並隨即由法官調解。
佢哋份離婚聲明提到，二人「有緣能夠相識相知，共同度過了一段幸福美好的時光。即使現在選擇分開，也非常感恩對方的付出。曾經，作為夫妻攜手前行，未來，兩人將以父母、朋友的身分愉快相處，也將繼續共同扶養孩子並給予孩子全部的愛與陪伴。」離婚消息傳出後，大S接受《蘋果新聞網》訪問時透露兩人離婚原因，「聚少離多，漸漸變友誼」，自己無後悔提呢個決定，更祝福前夫「找個更適合他的伴兒」，但自己嘅感情就隨緣。
據報，雙方針對大S名下6億多元（新台幣）豪宅、汪小菲「S hotel」3.5億元（新台幣）資產等財產分配，一對子女日後相處模式調解，近日即會對外宣佈離婚調解結果。
2011年結婚嘅大S同汪小菲，育有一對仔女。但佢哋婚姻一直唔被睇好，更不時傳出婚變。不過二人早年喺一個內地真人騷節目入面大曬恩愛，大S當時仲話S媽同佢講，食蝦一定要男人幫忙剝，「所以我嫁給我老公之後，他如果不幫我剝，我也不講，他如果幫我剝，我就吃。」大S被轟有公主病，但汪小菲當時護妻心切，喺微博力撐老婆：「她老公願意給剝蝦怎麼了，生了倆健康的寶貝，走了一趟鬼門關還不能讓老公剝蝦啦？」
而今年6月，汪小菲喺微博發表「漢奸論」，鬧確診COVID-19嘅台灣人去廈門嘅行為係「漢奸」，挑起兩岸敏感政治話題，令大S勁嬲。雖然汪小菲之後發文話「愛所有的家人，我老婆是第一」，但帖文又隨即被秒刪。後來汪小菲喺抖音刪晒有關大S內容，而佢嘅微博自我介紹都改做「小玥兒她爸」。
