宣明會嘅宣傳片話：「大家點忍心見到貧困小朋友繼續忍受不必要嘅痛苦，只係每日七蚊，就可以助養改寫小朋友一生。」啱呀，唔止令「小朋友」脫貧，直頭係共同富裕，又煙又酒又有車渣，旁白師都無車呀！
受助者「人不對版」 捐款去咗邊？
昨日有網民出po話透過宣明會助養咗小朋友多年前，最近通過啲report搵到「受助者」，先發現「人不對版」，一直以為嘅「受助者」根本唔知道有資助呢回事！
Channel絲電話訪問過事主Ian，佢話助養咗小朋友約20年，先後助養咗兩個小朋友。第一個係柬埔寨女孩，助養到佢上中學，就收到宣明會信件話女孩已經長大，可以自力更生唔洗助養，建議佢轉往助養其他小朋友，因為呢次助養經歷完滿，Ian嗰刻無考慮就答應繼續。
又煙又酒又跑車 反問事主攞500歐羅
如是者，Ian助養咗第二個小朋友都約10年，一樣係每年都收到report、聖誕卡等，點知今年Ian收到嘅report，就發現細路個樣好似仲大過自己，於是照住report上嘅名去ig搵，又真係搵到本尊喎！睇「小朋友」ig啲相發現，「屌！又煙又酒又跑車」，見唔對路，Ian直接發短訊畀「受助者」了解，話自己資助咗佢好耐，仲send埋宣明會嘅link畀佢睇，點知對方話完全唔知發生咩事，問「你sponsor咗咩gift畀我呀？」，坦言佢同屋企人都唔知有資助呢回事，講到最後仲竟然話自己掙錢讀書，叫Ian再捐500歐羅畀佢。Ian嘅fb po呻，「 67，我助養你都唔知係堅定流，仲敢開口問我拎錢」，仲hashtag咗「#國際詐騙集團宣明會」。
Ian話其實每個月捐款二百幾蚊唔係咩大數目，每月過數都根本唔為意，只係突然見到幅相咁大個先走去check下，「係有限錢，只係如果唔係用咗落對方度就無意思！」呢單野究竟係宣明會借刀撻人哋張相，定係受助人扮窮呃人接受捐款呢？宣明會都見到Ian個po喺網上被熱烈討論，有主動聯絡Ian，話要聯絡當地分區當局了解件事，搵嗰個人出嚟問清楚。
問到Ian有冇覺得好嬲、被騙，Ian就坦言某程度上預咗，「大家都講咁多次話呢啲呃人都預咗，只係上一次助養柬埔寨女孩嘅經驗幾好，咪繼續助養落去。」Ian話宣明會都已經停咗收佢錢。
宣明會曾畀人踢爆 助養小朋友相片重用
事件一出，唔少香港人都向宣明會尋求助養，話「想渣跑車，可否助養我，利申：少食煙會飲酒」、「請問如何申請被助養，Money pls my friend」，「祝宣明會發大財」等。其實今次都唔係宣明會第一次畀人踢爆，今年2月有網民踢爆佢助養嘅小朋友16、17歲張相係一樣，2018生埋鬚，到2019年返老還童，2021年張相又同18年一樣，同一頁書睇咗3年都未睇完！最後，宣明會埃塞俄比亞辦事處話因為地方遍遠，要義工同當地居民去影相，周年report又係人手做，所以貼錯相喎。根據宣明會網頁顯示，佢地會將總收入92.8%投入國際救援同社區發展，2.4%先係行政費，3.6%係籌款費。
宣明會喺2019年理大事件曾經出po，只係話好心痛同為香港祈禱，其實做善事都有好多方法嘅，大家又點睇今次件事？
