「好混亂～好混亂！」Channel C收到唔少讀者反映，問係咪前日（10日）開始進入商場等表列場所都要嘟「安心出行」，又見到皇室堡、海港城同The One等商場貼出指示，話「2月10日起進入商場必須掃描安心出行」。Channel C就問過食物及衞生局，局方澄清係2月24日進入商場先必須使用「安心出行」，同埋符合「疫苗通行證」要求。即係大家呢幾日都可以唔使嘟住～
至於令大家產生疑惑嘅「2月10日生效」呢句，局方就表示只係指係講商場、百貨公司、超市、街市或市集，髮型屋及宗教場所，當日起納入表列場所。
咁似乎唔少商場都誤會咗。網上仲流傳話葵涌廣場捉人無嘟「安心」，而且無口頭警告，一嚟就罰一萬。不過警方都喺facebook澄清「絕無此事」。而過去一星期，警方喺葵涌區票控喺公眾地方除口罩吸煙，或無合適配戴口罩嘅違規人士，無市民因為未有使用「安心出行」進入商場而被票控，並提醒《預防及控制疾病（規定及指示）（業務及處所）規例》（599F章）24日生效。
