旁白師世一！旁白師看透世事，喺2021除夕夜條片已預測過2022年香港人會再被疫情影響！
第五波疫情似乎殺到埋身，今日政府就宣佈收緊防疫措施，星期五（1月7日）起食肆晚市6點後禁堂食，非晚上堂食安排亦收緊，B類食肆限2人一枱、C類限4人、D類限6人，顧客上限維持不變，麻將天九耍樂暫停。599F下的15類表列場所須關閉，包括主題公園、美容院、按摩院、健身中心、郵輪等，康文署轄下場所亦會關閉，醫院、院舍都暫停探訪，措施為期14日。林鄭就話今次實行嚴厲措施，係希望短時間壓抑疫情，等大家新年可以出街同做生意，仲有係盡早啟動通關工作。
飲食業界叫苦連天，Channel絲隨機入幾間食肆做訪問，就聽到佢哋話「星期五、六、日係黃金時間，一定會有好大影響，啱啱先回復啲，大家都知啦！」、「基本上無眼睇，好無奈，政府做嘢好表面，咁簡單安心出行都搵唔到源頭，防疫措施根本就廢、垃圾，員工要放無薪假，幫工或替工又無嘢做，政府應該要想下點樣津貼資助！」、「已經賺唔到錢啦，而家更加賺唔到錢，呢幾日疫情多咗，生意斷崖式咁跌落去，等死囉！」
港大醫學院院長、政府專家顧問梁卓偉指，「希望兩星期內搵出所有社區潛在個案，包括未浮面嘅，否則太遲，第五波Omicron最低限度是3至6個月，先可以全面受控。」佢話Omicron傳播力強，每個患者可以傳染6至10個人，就算戴咗口罩，傳播力都只係減兩成，認為確診數字可以幾何級數上升，或者會出現大規模爆發！
現時九成的Omicron感染個案都是輸入，本地感染群組都是因為輸入個案衍生，例如老婦跳舞群組，是因為一位28歲空姐在美國感染到Omicron，回港不用隔離而傳染到同住的62歲老婦，老婦再去跳舞，再傳給朋友A和朋友B的工人姐姐，朋友B再上郵輪嘆世界，結果全船3700人要提早一日泊岸做檢測（btw，有網民發現TVB訪問郵輪旅客嘅劉先生，同政府疫苗廣告其中一位老友記撞樣！）
而望月樓群組都係因為國泰空少違反家居檢疫禁令，到望月樓用膳而傳染其他人。有報道指林鄭對國泰不滿，召見咗國泰主席和行政總裁嚴厲地訓斥，但有網民認為不應怪機組人員，因為佢哋已打針、做咗檢測，洗唔使隔離。
