「劉慧卿是一名政治人物和民主運動者，她關注香港人權、言論自由、性別平等等議題」，這是AI 軟件對劉慧卿的描述，也是卿姐讀港大的徒弟分享給她的訊息。卿姐今年主持全新網台節目《ChatDP with Emily Lau》訪問政界人士，指希望大家在香港即使有不同政見都可以一起討論，「我唔會好似有啲人唔准人講嘢，我最憎啲人唔准人講嘢，得佢講晒無人講，嘩！我㷫過火屎呀！」
特約記者 Yip Chan Wai (Wesley) 報道
劉慧卿不久前外遊德國，47人案開審前，有建制派質疑「假遊埠真著草」，卿姐如期回港，她是留下來的人之一。她是民主黨前主席、民主黨國際事務委員會主席。幾年前民主黨仍是第一大泛民政黨，目前只剩下區議會的 7、8 席，部份黨友身陷牢房，會否感到氣餒？劉慧卿直言：「我就從來都唔氣餒，我老虎都打咗兩隻，咪繼續做。」
卿姐目前常到法庭聽審、到收柙所或監獄探訪、獲邀為記者會嘉賓、主持網台節目、與徒弟交流見面，還有一些義務性質協助市民的工作。
探訪還柙候審人士
有天卿姐與前議員梁繼昌在早上約8時半到達荔枝角收押所探訪民主黨、前議員胡志偉——47人案中擬認罪、還柙約2年的被告之一。是日卿姐先到荔枝角探訪，後到西九龍聽審，47人案中不少被告仍關押在荔枝角收押所，認罪或部份被告是日不需上庭，收押所不斷有囚車進出。
卿姐：「 (胡志偉) 身心都……我睇到係健康啦。 」僅15分鐘的探訪會見，共需1小時完成登記及其他手續。
47人案開審時，胡志偉已還柙超過2年，卿姐嘆大家都感到痛苦，「有啲係未審嘅，都困咗成一兩年，咁樣你話真係好離譜，如果你拉咗人，如果係有事嘅，咪快啲開審，審咗睇下有罪冇罪」。未審先還柙在近年的案件中屢次出現，「畀人覺得，嘩，香港嘅法治去咗邊度呢？唔係咁樣喺裡面 (放着不管) 囉。」
除了目前還柙在荔枝角收押所的胡志偉，劉慧卿亦曾探訪李卓人、林卓廷等人。記者在收柙所外等候卿姐，期間有懲教人員查詢記者身份。卿姐、梁繼昌探訪後馬上趕往聽審，被問到兩邊走會否很「頻撲」，「有咩咁頻撲，嗰陣時做立法會咪仲頻撲」，47人案這日在西九龍裁判法院 (暫代高院) 進行。
聽審惹改圖批評
未進入法院大樓，外邊的警察重兵佈防，卿姐：「你睇幾多警察，好似『汪洋大盜』，真係誇張。」劉慧卿在47人案開審時，幾乎沒有間斷，每日堅持到法庭聽審。
不過聽審都並非無風無浪，有建制媒體就改圖，批評劉慧卿不屬於任被告的家屬，質疑她「濫用被告家屬旁聽籌」進庭旁聽，卿姐斥：「佢咁多麻煩嘢，咪講到夠，除非佢拉我，我都照樣去法庭 (聽審) ，有咩證據？完全都唔係，廢話。」
西九龍法院其後將「家屬籌」改為「親友籌」。
市民最熟悉的政治團體排第二
另一天卿姐獲邀作香港民研的嘉賓，當日公佈最新民調查顯示，市民在沒有任何提示下，能夠說出的最熟悉的政治團體，民主黨排名第二，「立法會雖然有90席，但係我哋就半席都冇，我哋亦都冇參加，喺區議會本來有90幾席，而家得返8席」，卿姐感謝市民記得民主黨，認為反映一個訊息「你話係咪屹立不倒都好，但係我哋仲係喺度。如果他日嘅選舉係公平、公正嘅呢，我相信我哋嘅黨友有人㑹想參加。」卿姐寄語市民不要被打窒、不要沒心機，「我哋一定要喺香港繼續撐落去，有人俾人拉，俾人鎖起幾年，但係呢係唔會打擊到我哋士氣，我哋會盡力去做。」
年輕醫護離港
卿姐身份是太平紳士，可協助市民為文件副本核實等，近期她已為很多名時任醫護人士核實文件，核實文件的作用是甚麼？原來不少醫護都計劃移離香港以外地方工作。卿姐：「佢去律師樓可以好貴，幾百蚊或者一千蚊去證明一頁，佢好多頁㗎嘛，我唔收錢嘅，所以佢哋咪嚟搵我。」
眼見移離的都是年輕一代，不少都是醫護或專職人員，卿姐雖跟他們說不要緊，「人係應該有選擇嘅，但係就我會次次都同佢講：『死囉，第日我哋去啲醫院咪冇晒人』，佢話有啲同事都叫唔好走住，因為太少人做嘢。」
這幾年香港人移離香港，即使在政府統計處也可反映，單是2022年底，就較上一年同期，減少近 70,000 人。這日卿姐主持網台 OurTV.hk《議會內外》，也探討到香港年輕人材流失的憂慮。該集嘉賓立法會會計界前議員梁繼昌：「後生仔，一係就移咗民，一係就唔生，出生率好低，咁點算？我哋真係要用一啲開明、開放、非一般嘅態度去處理。」卿姐：「就係返番去頭先講，我哋原有嘅優勢，香港嘅優勢就係：自由、法治。」
卿姐主持《議會內外》節目10多年， 「好多以前可以上嚟我節目嗰啲，而家都唔會嚟喇，可能係冇興趣嚟，或者唔敢嚟啦，因為個政治氣氛都好差或者好緊張。」又指，「有啲做完訪問，走咗喇，都叫我唔好出街 (播出) ，係好驚㗎啲人，你要知道社會嘅氣氛，對一啲人係有白色恐怖。」會否因此感到氣餒？劉慧卿：「我就從來都唔氣餒，我老虎都打咗兩隻，咪繼續做。」
香港不太好但也未至於最差 不會喪志
47人案中，被告未審先還柙逾20個月，卿姐嘆大家都不想香港變成如此，「行政長官李家超話『要說好香港故事』……咁多人坐緊監或者被審，以往大家認識嘅香港就係好自由」，卿姐強調不會因此喪志，「越困難，我哋就越要去支持，無論係佢自己，或者係佢嘅家人、朋友。」
對於目前政局，卿姐指雖然香港現在不太好，但也未至於最差，「依家梗係好困難啦，咁多組織都無喺度，但你有冇問下澤連斯基烏克蘭係咪玩完呀？人哋槍林彈雨日日都畀人炸，日日都有人死，人哋都照係咁啦！你睇下柬埔寨、緬甸、蘇丹……嗰條隊長到不得了，幾時先輪到我哋呀？」
對於香港可否可回復以往的自由，「如果我而家話畀有機會，你又話係咪黐線，係咪要驗下你個腦。」卿姐寄望大家只有盡力去做，「唔通我撼頭埋牆即刻死咗佢？一定要盡力做，但我冇應承你一定做到……（大家都）希望可以自由，安全，點解唔可以有個希望？」
不會從爭取民主的崗位退下
卿姐早前曾有機會到德國、日本外遊，卿姐：「我話去放假咋喎，但有啲人就講呢講路」，當時有建制派質疑「假遊埠真著草」，卿姐斥是沒有證據「亂噏，「後來我返到嚟，咁梗係啞晒啦……佢道歉都冇㗎喎。」
從政逾30年，卿姐直言，雖然在立法會退下，「但係我唔會從爭取自由、法治、人權、民主嗰個崗位退落嚟嘅。」
