「香港市民，最大嘅贏家，因為香港市民知道原來我哋有咁嘅權利！」「長洲覆核王」郭卓堅早前就政府指「免針紙」在本月12日起失效一事入稟法院，提出司法覆核，高院今日（21日）判他勝訴，判辭指醫衞局局長無權宣佈涉案免針紙無效，下令撤銷局長的決定，政府一方須賠償訟費。
【新聞有價 記者有格 立即訂閱：https://bit.ly/3wGQh7c】
「今日公義可以伸張喇！」郭卓堅對於今日的判決感到開心，「真正嘅法律，香港原來仲係法治之都！盧寵茂有乜嘢權話取消2萬張針紙，用行政手段取消呢個決定違反咗基本法。」郭卓堅指基本法第35條賦予香港市民有權對行政機構和行政人員的行為向法院提出訴訟，「左報成日鬧我，好司法審核，呢啲係國家畀我哋嘅權利！」
郭卓堅認為免針紙爭議應該交由醫務委員會調查，「嗰啲係合法醫生，唔係由盧寵茂話有問題，應該報告畀醫務委員會知，由醫務委員會睇下佢哋有冇失德，如果認為有失德先至話呢啲針紙無效，都唔係話2萬張，係要一張一張去查，依個係法律上嘅原則性！」又指中央政府支持特區政府依法辦事，但非支持濫權胡作非為，「今次我可以贏，而且攞到訟費，政府呢次係輸得相當之慘，睇下政府上唔上訴啦，如果上訴一樣輸畀我！」
對於判詞指醫衞局局長無權宣佈涉案免針紙無效，盧寵茂指現正介紹《施政報告》內容，未有機會詳細了解判決情況，會跟律政司研究判詞後才正式回應，但強調當局有責任保障全港700多萬市民的健康，是非常重要的責任和目標。
另外，今日有傳媒報道指，有消息人士透露今次事件情況緊急，上訴會浪費時間，所以政府內部傾向立即修改「599L章」，郭卓堅就回應指，「政府修例一樣照覆核，一樣照打，佢哋係無權修例！」郭指一條法例是要經過立法會議定，然後通過，再經行政長官確定，再刊登憲報，才能成為法律，「咩緊急法呀？緊急法係違反咗立法嘅程序！」
有記者問郭會否怕違反國安法，郭表示自己曾經就國安法司法覆核，當時周家明大法官指國安法非凌駕基本法，而是在基本法的框架下，納入基本法的附表，而今次他只是行使中央賦予給香港市民的權利，「同政府打官司，只要少少瑕疵都係輸，呢次李家超完全無晒面，因為取消針紙嘅命令係由行政會議，連同行政人員去執行，當時行政會議有湯家驊、李慧琼、林定國等法律精英，佢哋覺得講就啱，諗住有國安法，邊個夠膽覆核，但係我係唔怕嘅，因為係中央賦予我嘅權利，我係有權向法院提出訴訟！」
郭卓堅認為今次事件不只2萬人受影響，仍有很多沒有打針的人生活受困擾，「佢哋依家生活好似老鼠一樣，又唔可以去街食飯，如果獨居又唔可以去買嘢，乜都唔可以，咁佢哋點樣生活呀？你覺得依家我哋嘅政府係咪咁專橫無理吖？係咪應該要有人出嚟，為佢哋講句公道說話呢？爭取一個公道嘅權益！」郭明言未來若民生受到影響，一定會向政府提出司法覆核。
攝：Wesley Yip
