何君堯講自己經歷，就話政府前日（8日）下午公佈要隔離檢疫，但去到夜晚7點先有人聯絡，仲要到深夜12點先安排進入竹篙灣。佢就問相關人員，但對方表示人手緊張，因為一架車只可以車一個人，咁所以成個「洪門宴」群組要用170幾轉車接送。何君堯批評香港防疫「好睇唔好使」，又話防疫工作組織失調，食物及衞生局局長陳肇始要負責，而特首林鄭月娥要負「最終責任」。
身為執業大律師嘅何君堯，批評檢疫安排之時都不忘呢個身份，指國泰有豁免就應該有責任，要作出承諾保證，但結果就違反承證，話國泰有「Conspiracy to Defraud！再嚟一次！識唔識！串謀行騙！」不過睇返相關法律，應該就係串謀詐騙嘅。
何君堯喺直播入面話「洪門宴」係一個「合情合理合法」嘅宴會，只係「跌咗個有病嘅落嚟」，仲話 「我都唔想架」。點知而家就被加上「莫須有」嘅罪。講到中段，佢越講越激動，仲一嘢拍枱，大力到電話都跌埋。仲話「問咩責呀？特首要辭職啦！」，「個火要燒出去，林鄭要辭職！」
食生日飯冇錯，生日都冇錯，所以何君堯都話「洪為民冇錯，如果錯係佢阿媽嗰日生佢出嚟，但係你唔可以怪人哋老母架喎」，仲問「有邊個慶祝生日嗰日唔係真係生日？」呢度個邏輯Game高深到Channel絲都load咗一陣。
