聽確診數字聽到悶？今日就同大家講下其他數字！
民生方面嘅數字，今日都走唔甩要講菜價，高開3至4倍！沙田第一城嘅豆杯就要過百蚊斤，菜心由10幾蚊斤加到50蚊斤。有市民為咗慳啲轉戰超市買菜，依家仲未貴過廿蚊，西蘭花被搶購一空。
Channel C去旺角街市睇過，有啲菜檔都無乜菜擺出嚟賣，有菜檔阿姨話周圍啲菜都貴，因為來貨貴。有嚟買餸嘅女士都覺得好無奈，「貴啲啦，都要食o架！」另外一檔菜檔哥仔仲好勞氣，話：「啲司機全部都中咗招，唔畀佢落吖嘛！菜心、白菜、芥蘭貴咗1倍！1倍呀！係無，乜嘢都要搶，無咪要搶，啲人要食嘢o架嘛！」佢話除非香港政府發聲明，呼籲香港市民唔好食一個禮拜菜，咁供應多返啲咪可以平返囉。見到哥仔咁躁，都知生意難做，無奈地有中港司機確診，搞到超過60位中港司機困住喺文錦渡關口，無菜運到嚟香港，佢哋仲要被剔出豁免檢疫名單，21日唔可以來往中港兩地，睇怕嚟緊一段時間都要捱貴菜。
第二個數字係嚟自TVB聲夢歌手炎明熹嘅YouTube Views，FB專頁「思思 TVB 的二三事」收到網民報料，發現YouTube音樂排行榜與音樂數據分析顯示，GiGi已經衝出香港！聽佢啲歌嘅聽眾得4成係香港人，其餘嚟自印度、土耳其、烏克蘭、印尼等等，第十位才是同樣講廣東話嘅澳門！GiGi嘅歌《真話的清高》簡介係咁寫：「真話是信任的基礎，基礎不穩，無論感情多深都得不到真正的快樂。」呢首歌啱啱過咗500萬點擊，GiGi仲話要請食飯慰勞幕後，希望GiGi得到真正的快樂啦！學林二汶話齋，音樂無分國界同邊界，香港可以有國際化嘅歌手，係令人感動嘅！相比MC張天賦、MIRROR等等則未衝出國際，觀看次數8成都係香港人，要加油呀！
最後都要講少少疫情數字，有網民話想聽確診後康復數字！醫管局總行政經理劉家獻指，「過去24小時再多138名病人出院，至今合共有13,125名病人康復出院。個案編號#13400嘅病人目前情況仍然危殆，另外有1名84歲長期病患嘅病人編號#14814情況嚴重，其餘病人情況都係穩定。」再提提大家，政府喺各區採樣驗污水，如果樣本呈陽性，會向涉及住戶派發快速測試套裝，作自行檢測，但要留意一點，快速測試只係用作自願檢測，唔可以替代強制檢測！
