Google公佈咗2021年熱門關鍵字排行榜，究竟今年香港人最關心啲咩事？通常search啲咩字？今日YouTube片就同大家數榜，再講解下好多人要search嘅潮語係咩意思！
首先2021年度熱搜關鍵字No.1係消費券登記，為咗拎呢5千蚊真係唔容易，要search懶人包先搞得掂，9月頭仲搞到一班老人家要排隊申請，叻！
第二位係「奧運」，記得奧運嗰17日超級緊張，不停嗌香港加油，睇住張家朗花劍奪金，何詩蓓100、200米自由泳奪兩銀，劉慕裳喺空手道形同埋李皓晴、杜凱琹 蘇慧音喺團體乒乓攞銅牌，真心戥佢哋高興，無白費到背後默默嘅努力，而何詩蓓同張家朗都分別佔據熱搜關鍵字嘅第六同第七位o架！香港運動員要繼續加油！btw，唔知攞到牌嘅佢哋做到業主未呢？
第三位係「疫苗預約」，為咗谷針真係出盡法寶，又抽樓又現金券，的確吸引到好多現實嘅港人預約打針，不過打針前記得行量自己嘅健康風險呀！至於其他排位分別有iPhone 13排第四位，第五位梅艷芳，第八位安心出行，第九位魷魚遊戲，第十位就要重點講下，因為係今年人氣急升嘅盧瀚霆，佢同時榮登熱搜本地娛樂名人No.1，比所屬組合Mirror同隊員姜濤仲勁！
2021年可以話係「教主年」，橫誇歌、影、視都相當成功，歌出咗三首：《EGO》、《不可愛教主》、《Megahit》，《Megahit》更入圍「叱咤樂壇我最喜愛的歌曲」十強，影就憑《假冒女團》進軍影壇，視一定要講港版《大叔的愛》，阿牧一角令佢爆紅，神徒數目飆升。相信大家都記得7月7號教主生日，神徒嘅應援有幾咁誇張，連遊輪都送上祝福。至於熱搜本地娛樂名人其他排位分別係第四位《梅艷芳》女主角王丹妮、第五位捲入不雅片風波嘅吳偉豪、第六位唱作歌手林家謙、第七位男團ERROR、第八位《聲夢》炎明熹、第九位師傅愛你七仙羽、第十位奉子娶湯怡嘅麥秋成。
2021年仍然係無得去旅行，取而代之嘅當然係staycation，跟住落嚟就同大家數「Google香港2021年度熱搜酒店」。香港人身體很誠實，又要鬧，又要住，第一位就係香港迪士尼樂園酒店，贏咗開埋水上樂園嘅香港海洋公園萬豪酒店，不過都排第三位好受歡迎，而第二位係香港文華東方酒店，其餘四至十位係香港康得思酒店、九龍海逸君綽酒店、港島太平洋酒店、海景嘉福洲際酒店、帝逸酒店、百樂酒店同帝苑酒店。
其實Google出了18個榜，難以全部數出，最後想同大家分享一個較有趣嘅榜——「Google香港2021年度熱搜意思」，即係香港人因為唔識解啲新興潮語而要search咩意思，睇下排上有名嘅十個潮語你識幾多，就知自己潮唔潮喇！
第十位PUA，全寫Pick-up Artist，主要形容愛情，指一啲渣男、渣女用一啲手段控制伴侶嘅身體或者精神狀態，而家都有用嚟形容職場上嘅關係，例如被否定、壓榨、製造焦慮、人身攻擊等等。
第九位LOTR，要移民英國嘅港人都好熟識，指英國容許喺BNO簽證生效前，持有BNO嘅港人及其家人可於英國逗留最多6個月。
第八位FWB，Friends with benefits，類似炮友嘅意思，分別在於是友達以上，戀人未滿，有性關係但亦有深厚感情。
第七位NMSL，係「你媽死了」嘅普通話拼音，源自五毛嘅網絡攻擊，有咩拗唔掂回NMSL就搞掂！
第六位emo，emotion hardcore，原本係形容「非主流」樂隊好情緒化，唔掩飾自己嘅感情，而家就多數解emotional，如果話「我emo了」，即係「我抑鬱了」、「我頹廢了」等等。
第五位Shawty，嚟自亞特蘭大嘅潮語，以前解「矮仔」，而家就用嚟啲女仔好漂亮、好有魅力。
第四位自肥，有睇《ERROR自肥企画》就應該知，指利用公司資源嚟滿足自己嘅慾望，衰啲咁解可以話係中飽私囊，所以話「自肥可恥但很有用」。
第三位YYDS，同NMSL一樣由普通話拼音而嚟，但意思正面好多，譯「永遠的神」，用嚟讚人超勁。
第二位NFT，非同質化代幣，加密藝術潮流興起，NFT市場上有好多天價嘅藝術作品，利用區塊鏈技術交易，炒賣賺錢，利潤相當高，吸引咗好多名人參與。
第一位世一，2021年可能多咗好多前夫嘅關係，成日聽到「世一」就search下點解，就係解世界第一，通常fans都會捧偶像做「世一」。
Google一共公佈咗18個不同類別嘅熱搜榜，如果你有興趣知道其他，歡迎按此去Channel C嘅ig睇。
