霸氣印尼姐姐Contrinx一片爆紅，仲做埋KOL添！香港愛滋病基金會噚晚（25日）喺Facebook出咗同印尼姐姐嘅合作片，呼籲大家定期要做愛滋病測試，仲話「佢哋放假都唔攰，都會幫你做」，同埋提醒大家就算感染咗HIV，都係正常人！
原片入面，印尼姐姐Contrinx問僱主「點吖？你有錢大晒呀？而家試吓請工人，請得到咩？」，宣傳片入面就反問「你而家試下搵人做HIV Test 吖？搵到咩？」，之後就介紹香港愛滋病基金會即日起恢復返各類型HIV及性傳染病測試服務，「你可以上去中心做，又會揸架車出嚟幫你做」，最緊要係咩？係「佢哋放假都唔攰，都會幫你做咖」！
Contrinx姐姐都不忘提提大家，「工人都係人，唔係機械人呀，就算感染咗HIV，都係正常人」。一般公眾、男男族群、少數族裔人士都可以預約到中心測試或流動車測試。
