野豬啊野豬🥲有讀者報料，噚晚（25日）喺大埔公路大埔滘段，近觀海崇庭嘅位置，有一隻野豬懷疑被車撞倒受傷倒地，司機不顧而去。短短6分鐘之後，有一架巴士懷疑收掣不及，輾過已經受傷嘅野豬⋯⋯相信野豬都已經死咗⋯⋯😿
噚晚大約19:55，事主經過事發地點時，見到隻豬喺路中心就避開咗，同埋即時報警，但打咗兩次999 ，電話錄音都係話線路繁忙要等待。於是佢哋就一路兜一路打俾附近嘅警署，當時見到隻野豬仲有反應，應該未死，所以佢哋就暫時停喺路邊較後嘅位置觀察野豬。
沙田警署就回覆佢哋話地點唔屬於佢哋嘅警區，不過會轉返去啱嘅警區跟進。不過只係相隔6分鐘，約20:01就有一架巴士可能趕唔切煞掣，轉唔到線，直接輾過本身已經受傷嘅野豬。事主之後向前駛，就見到隻豬應該已經身亡。
