醫護捱義氣入亞博照顧染疫病人 自費食「凍」頹飯：膳食細份，又貴，女仔都唔夠飽 公立醫院病床不足，醫護人手短缺，不但未獲特別津貼；即使醫護自告奮勇到亞博檢疫中心照顧確診病人，亦只能捱貴價「頹飯」。有讀者就向Channel C報料，指其任職醫護朋友上月申請調往亞博工作，但「膳食好細份，又貴，女仔都唔夠飽。本身$68，經過一輪協調先$44，但份量都好細，又唔好食。」
據報料人所講，因為唔可以叫外賣平台訂膳食，所以醫護都係「局住要」，而膳食係亞博入面一間餐廳提供，醫護人員自行畀錢訂購，每日有3款選擇，包括一款素食。其中一日可供選擇嘅午餐就有：洋蔥汗雞球配白飯、鮮茄豬柳配白飯，同埋菠菜意大利芝士卷配番茄汁及時菜。睇菜名似乎都應該唔難食，又有選擇畀素食者，不過報料人轉述醫護話，飯盒送到嚟時已經凍晒，而且成日送錯嘢，但換唔到，又成日遲送嚟，攪到醫護嘅食飯時間少咗。
醫護壓力爆煲，想食個熱飯嚟慰勞自己都似乎變得奢侈，所以讀者都希望藉Channel C幫亞博嘅醫護發聲，「亞博做嘢嘅醫護因為full gear，好多時連廁所都唔去，一日剩係食飯嗰陣可以休息一下食啖飯，盒飯唔好食仲要貴，同埋係要自己比錢，間餐廳真係好無良心！」
