你就買定離手姐，有一大堆人就離開香港添！雖然有唔少人對於近期確診數字開始麻木，但係原來仲有一堆人係覺得日日千幾，甚至幾千單確診係咁得人驚，驚到要北上「避疫」！
片中可見前往深圳灣口岸嘅的士車龍，唔講以為又上演鄧寇克大撤退……旁述師兄都忍唔住要係咁話「嘩～深圳灣上路呀！避難呀～」，加埋大量嘅港式助語詞，Channel絲完完全全感受到師兄嗰種驚嘆。
點解要走？一位帶有鄉音嘅女士，就帶埋媽媽同個女趕住走，佢就話因為媽咪「有三高、四高，阿女又未打針，得三歲，屋企啲人都唔安全，就算我打咗幾多支都冇用啦係咪？」實情就係總會有人身體係唔適合打針，又驚中招，唯有離開香港啦。
不過，其實深圳灣口岸近日就已有大批人滯留。深圳市政府話依家隔離酒店嘅數目，已經應付唔到急增嘅人流，就呼籲未預約酒店嘅人唔好去口岸喇。
好行唔送喇，Channel絲都係乖乖地留喺香港，日日同大家開盤，睇下確診數幾時回落！大家數下佢成條片講咗幾多個「嘩」？
