呢個香港，除咗林兆波之外，原來仲會有人咁「愛❤️」特首林鄭月娥。近日有署名「農場餐廳陳興濤」登報，向「至美麗的雲彩」（林鄭）示愛。呢位師兄評論政策之餘，仲加插咗好多個心心❤️畀林鄭……
陳師兄嘅文章「香港抗疫之路四」唔似係一篇對於疫情嘅文章，似係一篇情信。一開波就以「Carrie！我們的特首，我愛妳❤️！…」開場，之後就直接向林鄭示愛「第八點…大愛無涯…Carrie師姐！我是真心至誠愛你！❤️❤️❤️……我唔去愛你，咁！我要去愛誰呢？！難道去愛❤️李家超司長？去愛❤️陳茂波司長？或去愛去一位一位❤️鄭司長？」
「妳更是我心中至美麗的雲彩」，呢啲句子以為只係會喺小說散文入面見到，點知有人會用呢句向林鄭示愛，又長知識了。陳興濤就話「這種小愛我只會靜悄悄地去愛」，不過可能都知道自己會嚇親人，所以「不得不請特首閣下及香港市民，原諒我的莽撞！因，我已心如鹿撞……」
「Carrie！我愛愛愛❤️的Carrie特首！」未完架，喺幾篇嘅登報文章入面都出現呢啲心心，「我撕心裂肺的愛你，咁！咁！ 妳❤️愛我好嗎？」
唔知道大家有冇留意每朝嘅特首見記者環節，睇嚟陳師兄唔會錯過每一個可以見到林鄭嘅機會：「每天早上十一點見到妳，是我在疫情困頓下最大的安慰，我是真心愛❤️妳的。……我愛妳愛妳❤️……我愛妳愛愛妳❤️❤️！」
早前有民調發現，有4成市民直接畀零分林鄭，不過陳師兄就話「就算連七百多萬全港市民，除了我一個，統統都唔知妳真正衰甚麼！妳只衰在一點上，就是我，陳興濤，俾妳的愛，來得太遲！」Channel絲就嚟打唔到落去了……「憑著我俾妳的愛❤️，我有絕對信心妳可以帶領香港走出逆境！」
「妳咁大膽，我愛妳妳是不會怕的，妳就大大聲講句，妳都愛愛愛❤️我，好嗎？」去到呢個地步，冇人夠你大膽啦，陳師兄請受我們一拜！
畀返少少背景資料大家先，陳興濤最風光時，曾經一家五口同住半山五千呎連天台海景豪宅，有三個工人及司機，不過破產後搬至深水埗三百呎唐樓。而「農場餐廳」可以話係陳興濤畢生巨作，陳在2005年獲法庭解除破產令後，2008年在上水石湖墟市政大樓街市熟食中心重開「農家意粉」，亦於同年擴充至葵涌，不過前後總共5間分店於2015年1月全數結業，而現在的「農場餐廳」是於2015年7月開設。
