今日有報道指一名34歲男子涉嫌冒警騙財，警方呼籲市民遇到有人自稱警務人員時要份外小心，必要時可以叫對方展時委任證。不過，最近一間網店「韓職K League球衣代購」就出Post話，有位客人「Vincent Chung」不停催佢寄貨，狂轟炸鋪頭Fb之餘，仲影埋張疑似香港警察委任證出嚟「撻朵」，令店主不堪其擾，要趕出去包埋郵寄貨畀佢。
「韓職K League球衣代購」喺個Post到講，件波衫其實只係到咗貨兩日，亦都有同Vincent講話未得閒寄貨，但都不得要領。Vincent仲喺網店嘅FB留下「不推薦」評論，話「貨到後應承寄衫不停拖延，如果唔係講哂粗口都唔肯寄衫」、「一定唔會再幫襯！仲慘過求你去寄件衫比個客」等。而店主就係下面Commet，公開佢哋其中一部份嘅對話紀錄， 見到Vincent影低自己個銀包，仲突咗張警察委任證出嚟，話「一係今日交收，一係刮你出嚟」，仲講咗句「自己睇路」。而見呢部份紀錄俾店主Show咗出嚟，Vincent就話係店主反口在先，「咁你唔好應承人下午寄，夜晚寄，之後又話第二日寄。第二日又係咁⋯⋯」、「電話又唔留唔覆。而家香港每日幾多鋪頭呃人錢」，似乎非常驚遇上黑店。而店主就再三解釋，話唔得閒寄係佢唔啱之類，而Vincent就繼續重覆係佢唔寄貨在先⋯⋯無限Loop到2046，但就無講點解要Show張委任證。
有網民就留言問Vincent點解要叫店主睇路，而佢都係一路無限Loop「呃錢都唔叫對方睇路，犯法呀。每日幾多人收哂錢唔派貨行騙」，強調係認為店主呃佢錢。Er，其實如果店主真係拖足好耐都唔寄貨，又真係會覺得可能俾人呃錢嘅，但Channel絲真係唔建議大家叫人睇路、疑似Show證撻朵呢啲嘢囉～而Channel絲㩒返入Vincent嘅Facebook睇，發現佢兩年前去過八鄉少年警訊中心影相，至於佢張委任證係真定假，我都好想知呀～
