新一份《財政預算案》宣佈多項「派糖」但「減甜」措施，其中電子消費券縮水一半，僅派$5,000元，引起熱議，財政司司長陳茂波今早出席電台聯播節目時回應主持及聽眾提問和意見。聽眾張先生認為，所謂赤字只是千幾億「濕濕碎」，加上政府有外匯儲備及基金，故即使面對赤字亦無需緊張，「唔係洪水猛獸吖嘛」，批評政府「派得嗰5,000元，越來越縮，人哋澳門派嗰1萬，細路仔都有，派足十幾年，所謂輸人唔輸陣，你話香港係咪真係好丟架啊司長！」
【新聞有價 記者有格 立即訂閱：https://bit.ly/3wGQh7c】
張先生續點名指摘陳茂波，「波叔你就『劏房波』，點解咁鬼孤寒嘅？做人唔係咁㗎嘛，全香港個個都受惠，點解唔派多啲呢？大家開心！消費券應越來越多，唔係越來越縮。輸人唔輸陣，你咁樣係好冇面㗎！」陳茂波回應指，政府不能「打腫面皮充闊佬」，外匯基金用作捍衛聯繫匯率，不能輕易動用，一旦動搖金融及貨幣穩定將對社會造成很大傷害。他指雖然今次預算案「派糖」措施「粒糖冇咁甜」，但希望市民諒解，重申是力所能及。
聽眾林先生亦關注消費券問題，指市民可將消費券購買進口貨、奢侈品，而非花費在服務性行業，變相金錢並非在港流動，認為對本港經濟幫助有限，提議將消費券用於服務性行業，並稱曾向司長辦公室反映惟不獲正面回覆。陳茂波表示認同，稱若以消費券購買進口產品，「令經濟效益有所流失係事嚟」，政府曾考慮發放只針對餐飲業的「定向消費券」，但政府調查發現市民希望有更多選擇，加上過去幾年零售業亦面對經營困難，故決定不設相關限制。
至於聽眾何先生則不滿加煙稅，「係咪有權有勢嘅人就可以食煙呀飲酒？窮人就食唔起、飲唔起？……點解不斷攞煙民嚟開刀呢？」陳茂波解釋，加煙稅是考慮到市民健康，過往研究亦有指加煙稅是最有效讓煙民減少吸煙措施，故接納醫衞局建議。
