大家仲記唔記得早排「有人」被篤爆幫襯無牌按摩場，之後間骨場仲懷疑係色情場所？今日（13日）灣仔警區開記者會，話喺灣仔及銅鑼灣區搗破多9個賣淫場所，拘捕多33個人，喺呢個「驅霆」行動入面，總共拘捕咗101人，涉及25個賣淫場所。
警方話，今年7月進行第一輪「驅霆」掃黃行動之後，調查到16間賣淫場所係被3個唔同嘅犯罪團伙操縱，再「順藤摸瓜」調查背景。其後發現1個賣淫集團「死灰復燃」，喺灣仔及銅鑼灣嘅商住大廈經營偽裝成按摩院嘅賣淫場所。33名被拘捕嘅人入面，2名本地女子涉嫌「經營賣淫場所」，26名女子涉嫌「協助管理賣淫場所」，即提供性服務，協助訂購與賣淫相關物品，其中有4名係越南籍及中國籍非法入境者，分別由越南、福建、珠海經水路到港，喺賣淫場所居住。
警方都發現接客方式唔同咗，翻查被捕人士嘅手提電話，發現佢哋會用高私隱度嘅加密通訊軟件溝通，例如係Telegram同埋Zello，因為有匿名同埋可以自動刪除。
