前香港警務處處長曾偉雄噚日（5日）接受訪問時，就話香港走私、毒品、黑社會問題變得「好誇張、好離譜」，覺得就係因為「黑暴」期間，連水警都要「上岸」處理陸地嘅事，呢啲「工作調動」令到水警唔夠時間專注處理問題喎。
Channel絲見狀，就醒起早排（11月29日）「公務員secrets」facebook專頁就有聲稱警隊「前線」投稿，大談警隊投考人數下跌嘅原因，例如係薪酬、「忽視抹黑力量」等等。
呢位「前線」控訴而家嘅後生仔「幾易被洗腦」，但係「怪就怪過去警隊澄清動作做得太慢，任由有心人為咗抹黑我哋警隊貼到周圍都係文宣」。佢又覺得管理層招募方向出錯，「整埋啲咩『招募號』方向完全錯曬！忽視內部真正需要及福利」咁話喎。
「前線」話警隊工作量多幾倍，但人工就「只係多幾千蚊」，舊制底下，「新人做曬所有嘢」之餘，半年至一年都冇新血加入，「新師兄太辛苦都揀唔撈」，仲要「輪班做到你成隻牛咁」。仲要做埋啲「無厘頭」嘅工作，「呀女唔肯做功課又報警，隔黎屋隻狗吠又報警，冷氣機滴水又報警」，仲話「想穿防暴拉黑暴一定唔會咁快有你份」。
就連呢位「前線」引用埋古語「有麝自然香，何必當風颺」嚟叫大家唔好做警察，睇嚟警隊都真係有好多問題要處理喇。值得留意嘅係，「公務員secrets」admin留言都要戴一戴頭盔，話「此投稿不代表專頁立場」，嘻。
