美國著名電影網站「TC Candler」，每年都會整張「全球百大美麗臉孔」名單，2021年嘅最新排行喺周二（28日）出爐，泰國混血LISA@BLACKPINK勇奪女性排行榜榜首，而男性排行榜則由嚟自緬甸、有「最帥和尚」之稱嘅Paing Takhon奪得。
今年25歲、身為嘅男演員兼模特兒嘅佢，曾經因為一輯着住僧服嘅出家「和尚」照而喺網絡世界爆紅，除咗被稱為「最帥和尚」，更加有人叫佢做「亞洲水行俠」。因為知道自己喺社交媒體有唔少嚟自世界各地嘅Fans，Paing Takhon經常透過IG等渠道幫緬甸人民發聲，更加曾貼出自己參與集會的相片，呼籲大家關注局勢。到今年4月8日，Paing Takhon被緬甸軍政府拘捕，而喺「全球百大美麗臉孔」名單公佈嘅同一日，佢更加因為之前曾經支持緬甸人民示威，而被當地判3年勞改。當地亦都封鎖咗屬於Paing Takhon嘅IG同Facebook專頁，而家只有Fan Page先可以睇得返佢嘅相。
雖然早前網上曾經流出一張Paing Takhon被拘留之後嘅憔悴面容，但相信亦都唔會影響到佢喺大家心中嘅英姿，言行對得住自己嘅人，永遠都係世一。
至於其他男性上榜者，「雷神」Chris Hemsworth排第2、V@BTS排第3，著名YouTuber PewDiePie亦都打入前十，排第9。女性方面，子瑜@Twice排第7、三位BLACKPINK成員Rosé、Jisoo、Jennie分別排第17、26及30名，而日本女演員石原里美則排第89名。
