疫苗通行證昨（24日）日實施，12歲或以上人士進入商場、食肆等場所須最少接種一針。稻苗飲食專業學會主席徐汶緯在港台節目《千禧年代》表示，不少市民未適應新安排，而且D類食肆收緊至2人一枱，令食肆流失部份長者客，「早茶做完運動可能3、4個長者去飲早茶，食早餐，收緊到2人就無興趣，無嚟啦，有啲無準備好（疫苗通行證所需）步驟，又無嚟啦，總括跌咗4成左右生意。」
他提到食客昨日遇到的問題包括：不清楚步驟，誤以為掃安心出行後顯示藍色二維碼，便可進入食肆，但其實他們需再將藍色二維碼對準餐廳提供的電話再掃；亦有食客未有將電子針卡連接到安心出行，故職員需花時間協助；另有食客本身有打針，但沒有帶接種紀錄，結果「做唔到佢生意」。而昨日就約有一成顧客，因未能滿足疫苗通行證要求無法堂食，被逼轉外賣。
被問到兩項措施哪項影響較大，徐汶緯認為，堂食2人一枱過去亦實施，所以「一定疫苗通行證（對生意）影響大啲」，因為首次推出，好多市民需時適應。當中最受影響食肆是酒樓、中式餐飲等較大型食肆，其次是茶餐廳、冰室、快餐，「因為呢啲過去用餐模式比較快，但而家要用疫苗通行證，可能喺門口要搞1、2分鐘，2、3分鐘先入內，其實2、3分鐘，喺冰室、快餐店嚟講都攞到個餐出嚟，所以影響嘅客人都十分之大。」
食肆員工須主動核查市民的針卡，徐汶緯指，整個技術做得不錯，但他認為，部份地方仍須微調，包括手機的前置鏡頭像素不足，「冇1,300萬像素同自動對焦係難以對準針紙，要搞一輪，有啲業畀買咗幾部手機返嚟，無注意到呢點，前置鏡頭就用唔到」，令食客需要繞到後面利用後置鏡頭掃。
