最近有網民發現，觀塘一間新開冇耐嘅樓上餐廳「山戶屋」嘅Logo同一間日本過江龍「大戶屋」嘅Logo冇十成都有八成似。先唔講兩間餐廳個名本身都似，logo由底色嘅深藍色，甚至連大字下面嘅兩條白線都一樣，「山寨」版只係中間多咗一個圓圈圖形。
網民再搵到呢間新餐廳嘅餐牌，發現佢入面都有疑似抄襲返嚟嘅圖案，同樣嘅圖案都出現咗喺呢間新餐廳門口一個木牌上。開post嘅網民就覺得係「偷人哋logo扮歷史悠久」，又話「不過與其話山寨，不如話係直接偷來用」。其他人就留言話「都真係擺明抄喎」，仲發現呢間餐廳嘅食評全部都係第一次寫食評嘅帳戶，懷疑係打手。
Channel絲分別向兩間店鋪查詢，「大戶屋」就話對上述事件亦都有所聽聞，澄清喺香港只有太古、銅鑼灣、中環、荔枝角及荃灣5間分店，同呢間餐廳絕無關聯，會保留一切追究權利。而打電話去「山戶屋」問嘅時候，就只獲職員告知一句「未知幾時有人答到你」，唔知大家又點睇呢？Channel絲淨係知，「大戶屋」成日要等好耐位，燒五花腩同黑醋雞好好食呀！！！！！
