本月初向一間網店店主展示警察委任證相片，並提醒對方「睇路」而掀起「撻朵」熱潮嘅男顧客「Vincent Chung」，據報為一名警務人員後，噚日（21日）有報道指呢位男警近日需接受警方紀律覆檢，但未被停職。
警方回覆查詢時就話不評論個別個案，強調警隊重視人員紀律及操守，亦要求人員不論在當值或休班時，均須恪守警隊的行為守則及價值觀。任何人員如違反紀律，警方會按既定程序公平公正處理。
事源網店「韓職K-League球衣代購」本月初喺facebook出post話，呢位「Vincent Chung」客人不停催佢寄貨，狂轟炸舖頭fb。帖文附有兩張截圖，其中一張見到Vincent喺網店fb留下「不推薦」評論，話「貨到後應承寄衫不停拖延，如果唔係講哂粗口都唔肯寄衫」、「一定唔會再幫襯！仲慘過求你去寄件衫比個客」等。而店主就commet回覆，並公開佢哋其中一部份嘅對話紀錄，見到Vincent影低自己個銀包，仲凸咗張警察委任證出嚟，話「一係今日交收，一係刮你出嚟」，仲講咗句「自己睇路」。
