政府昨日傍晚首次透過緊急警示系統發出「緊急警示」，通知市民伊利沙伯醫院即日起成為定點醫院，結果嚇到有網民以為「俄羅斯打到嚟」；立法會議員霍啟剛都指，「真係俾佢嚇死」、「心臟負荷少啲都唔得」；李梓敬亦反問「可否出返一啲真正緊急嘅警示？」
不過，特首林鄭月娥今日在記者會上就表示，認為符合當年建立系統的理據，「昨日情況適合應用，事實上無人可以懷疑今日處於一個緊急狀態，係公共衞生緊急狀態，如果唔係都唔會有咁多《緊急法》實行緊。」而且伊院為醫管局內最繁忙的急症室，「我知道好多去到新界居住居民唔舒服、有急事會自行去QE」，亦難保有市民未收到訊息，會一直都去伊院。
被問到昨日1100及430記者會上早已提到，伊院會成指定醫院，訊息又有何緊急，林鄭則反駁，恐怕並非好多市民睇記者會。她又說，所有緊急警示都不會讓人有心理準備，她昨日收到訊息時正使用電腦，「嗰一刻覺有點怪，咩事呢？」但認為緊急警示值得去做，因能令全港市民適時掌握訊息。
對於記者指不少市民感到恐慌，形容是《狼來了》，林鄭稱，「當然用第一次永遠會有唔同反應，你有轉述反應，我都睇到好多市民喺其他平台話都幾好喎，以後慣咗政府會通知我哋，當然你話冇心理準備，響起10秒又有震機，市民有少少焦慮，我都解釋，作為城市管理手段，有呢一套系統，唔好話公共衞生，第日如果有其他緊急事項，我唔希望有啦！但難保，尤其是坐喺保安局局長隔離，香港治安有時都有緊急狀況......第日如果有急緊情況作出全社會警示，大家就會知道係咩一回事。」
她續指，不知道手機的緊急警示功能能否關閉，但不希望市民關上，「當全人類喺香港都收到信息時，佢就收唔到訊息，對佢一啲都無利。」
另外，食物及衞生局長陳肇始今早在商台節目亦表示，市民平日有機會到伊利沙伯醫院求診，認為是有時間性及迫切性通知市民。她指會反映市民的意見，包括考慮調整在收到警示時電話的聲響，但強調政府會透過系統，向市民發放緊急信息，呼籲市民不要關閉通知功能。
