特首林鄭月娥今日宣佈唔會競逐連任，消息一出，5年前與林鄭競逐特首之位嘅前財政司司長曾俊華，就即時喺facebook換cover photo。張相就係同Edan好友蔡俊彥等嘅一眾年輕劍擊運動員嘅合照，再望真啲，企喺中間嘅曾俊華就笑得「見牙唔見眼」。曾俊華之後仲換埋舉晒韓式心心嘅profile pic，似乎另有所指咁啵。莫非林鄭唔連任，曾俊華最開心？
原來，呢位前財爺邀請咗日本畫家山内庸資（Yosuke Yamauchi）為佢設計3,000個「Choi Yeah NFT」，今日推出。佢解釋，疫情、經濟、自身去留，令大部份市民嘅生活都不易過，但佢話，佢依舊相信香港人，希望香港人喺呢個困難時刻可以更加開心咁講，所以就有呢個企劃。而呢個NFT嘅擁有者，會喺發行後1年內，收到佢為港人挑選嘅6件小禮物喎。
不過時間又會咁啱嘅？佢話，團隊喺一早已經定好咗今日推出，同「其他時事新聞絕對無關」喎。
佢咁講啫，網民信唔信就係另一回事喇。有網民留言話「此時更新相片，好難令人相信係偶然」，又話「 睇下而加邊個笑到最後」。有人就笑指「林鄭可以同曾生一樣享受退休生活」。識得揀啱呢個間嚟抽水，睇嚟曾俊華都深曉網絡嘅玩法喇。
