喺香港，要親身見高官一面，可謂難過登天，不過而家各位有機會啦～政務司司長辦公室日前出咗個招聘公告，要幫司長李家超嘅官邸請一個合約家務總管，月薪31,750元。話晒要做官邸嘅「大內總管」，呢份工嘅要求都有返咁上吓㗎，首先你要有9年家傭服務或宴會服務等嘅經驗，亦都要具備良好嘅人際同溝通技巧，咁先可以睇住啲下屬。而因為負責官邸傢俬同陳設品嘅保養、庫存紀錄等，所以最好要識埋一般電腦軟件嘅技巧。其他職責都係一般家頭細務、宴會餐飲款待等，但就可能需要不定時工作，即係要喺夜晚、週末同公眾假期開工。
合約以非公務員合約條款聘任，不過留意番，雖然係非公務員合約，但按而家嘅規定，獲聘者都係要宣誓㗎～
