是咁的。日本有間公司，個名就叫做「株式会社スマイルアカデミー」（微笑學院）。你問Channel絲呢間公司做咩？答唔到你，Channel絲淨係知佢哋成間公司都係圍繞住爆肌猛男，而呢個免費圖庫「マッスルプラス」（肌肉普拉斯）就係其中一樣佢哋做緊嘅嘢。
呢個圖庫有啲咩？有爆肌調酒師、爆肌女僕cafe、爆肌插秧農夫、爆肌採茶漢、爆肌男大戰兵馬俑、爆肌band友……仲有兩個肌佬着浴袍喺酒店走廊追逐、赤裸上身喺花海奔跑，擺埋可愛甫士賣萌，真係腐女諗唔到嘅情節都有。總之所有圖輯都係胸肌、手瓜、腹肌，要乜肌有乜肌。你問我啲圖會喺邊度用到？Channel絲而家暫時覺得啲圖可以用嚟做wallpaper，印出嚟貼喺朋友、男朋友、老竇日常會見到嘅位置，提醒佢哋減肥啦，不過問我商業用途嘅話，我就真係未有頭緒喇。
佢哋仲有個YouTube Channel，不時會上載拍攝花絮，笑到Channel絲差啲連稿都打唔到落去。不過我一路睇，一路喺度諗：究竟佢哋個腦平時係裝啲咩嘢，先會諗到咁樣玩嘅呢？
話明免費圖庫，Channel絲就決定唔理咁多，download定一大堆以備不時之需！集思廣益，你哋如果諗到任何用處，記住喺下面同Channel絲分享！又或者你想推介朋友加入呢間公司，請大大力喺留言tag佢出嚟！
