鑽石山荷里活廣場命案，林作發帖指「邊個夠膽抽呢單嘢水嘅死全家」，自己卻抽水模仿疑兇衣著。日前林作的家人出現，另一半裕美直播賣貨，可是直播全程不斷被網民留言責罵，激得裕美嬲嬲地，大罵林作：「佢對我都冇同理心架，更何況出面啲人，係咪？」另一方面，林作於社交平台上載多張對話照片，以示有人反對保誠保險公司炒他魷魚，但有網民反指他視反對聲音如無物。林作又表示，今日下午6時將舉行記者會交代事件。
【新聞有價 記者有格 立即訂閱：https://bit.ly/3wGQh7c】
林作抽水事件後，他任職的保誠保險發出嚴正聲明，表示個別理財顧問的不當言論及行為，與保誠的價值觀背道而馳，決定終止其合約。林作昨日即在社交平台發表多個帖文，上載多張疑似對話留言的Cap圖，內容大多是反對保誠保險炒林作魷魚，及支持林作的言論，林作稱部份留言出自他的保險客戶，或下線的客戶。不過網民依然唔俾面，繼續鬧爆：「收檔喇7頭」、「咁你之前炒你嘅下線又點計？你就炒得人，人地（哋）唔炒得你？」、「鬧你個（嗰）D客留言，可以睇睇嗎」、「死囉，仲唔知道自己錯係（喺）邊」。而林作仍不肯對事件作出道歉，並表示今日舉行記者會交代事件。
而林作抽水po出街後，他和裕美仍然開直播賣貨。可是裕美一開台就被網民鬧：「臭鞋賣咗未！食屎啦！人性之惡，把無知當有趣！！！」、「林作應該公開道歉！」裕美卻回應：「大家認為佢冇同理心吖嘛，我同佢一齊咁耐呢，我自己都成日咁話佢嘅，所以好正常，佢對我都冇同理心架，更何況對出面啲人，係咪？」又說：「你哋見佢抽水先想打佢啫，我日日都想打佢呀。」
直播接近中段，林作現身，此時裕美已嬲嬲地，問林作：「你有冇道歉架我想問？」林作答：「我成世人都冇乜點道歉個喎，我再次講多次，搞笑還搞笑啫，你唔喜歡唔緊要嘅。」裕美更嬲：「但你搞到我喎，啲人都鬧埋我喎。」林作反駁：「我覺得啲網民如果好過份偏激…」裕美：「我唔理係咪偏激吖，但而家搞到我吖嘛！」林作：「我對你就梗係道歉啦，如果其他人搞到你。」裕美未熄火：「關我乜嘢事呀？」不知是真耍花槍定夾定。
林作對鏡頭說：「我覺得大家要搞清楚，你要攻擊就攻擊我，你唔好殃及無辜呀，我覺得呢個唔係太公平呀呢件事…攞嚟搞笑呢，攞任何話題冇問題，無論係愛滋病、癌症、非洲嘅肌餓，甚至乎猶太人大屠殺，呢啲係事實發生咗嘅事，大家唔好逃避，大家唔好去害怕講呢啲嘢。」
他又解釋沒有把事件當笑話，但這樣說：「我哋唔係將呢件事當成笑話，我哋開玩笑啫。」裕美聽到即時反白眼。他繼續說：「搞到好似要對兩位死者道歉咁，唔關事架。」
直播最後，裕美表示要打林作，林作拒絕在鏡頭面前被打：「鏡頭面前唔好睇吖嘛！」裕美爆：「你最鍾意鏡頭面前做嘢架喎，做埋晒啲唔知咩個喎，點解而家唔打得呢？」
